Read DIEM PROTESTANTA Salamo 57 Bible Online

Salamo 57 - DIEM PROTESTANTA bible

Salamo 57

¹Tao amin’ny tahirin-kiran’ny filohan’antoko-mpihira. Hohiraina araka ny feon’ny hoe «Aza ravana....» Salamo nataon’i Davida fony izy nandositra lavitra an’i Saoly ka niery tao anaty zohy[110].

²Iantrao aho, Andriamanitra ô, iantrao satria Ianao no fialofako; eo ambany elatrao tokoa no ialofako mandra-pidifin’ny loza.

³Ilay Andriamanitra Avo Indrindra no antsoiko, dia ilay Andriamanitra manao izay mahasoa ahy.

⁴Hirahiny avy any an-danitra anie ny famonjena ahy, hataony ho afa-baràka anie ireo mpanenjika ahy! Fiatoana Eny, hirahin’Andriamanitra ho amiko anie ny fitiavana amam-pahamarinany!

⁵Izaho monina afovoan’ny fahavalo masiaka izay tahaka ny liona mandripaka olona: toy ny lefona na zana-tsipîka ny nifiny, toy ny sabatra maranitra ny lelany.

⁶Andriamanitra ô, misandrata Ianao hanerinerina any an-tampon’ny lanitra. Aoka anie ny voninahitrao hamiratra amin’ny tany tontolo!

⁷Ireo fahavaloko efa namelatra fandrika harato tamin’ny lalako mba hampitanondrika ahy; nihadiany longoa teo anoloako, kanjo izy ihany no latsaka tao. Fiatoana

⁸Andriamanitra ô, mitombina dia mitombina ny foko[111] ka hihira sy hankalaza Anao amin-tsalamo aho.

⁹Mifohaza, ry fanahiko; mifohaza, ry valiha sy lokanga, fa tiako hofohazina ny mazavatsinanana.

¹⁰Tompo ô, vory vahoaka no hiderako Anao ary eo anivom-pirenena no hankalazako Anao amin-tsalamo,

¹¹satria lehibe tafapaka amin’ny lanitra ny fitiavanao ary avo tafapaka amin’ny rahona ny fahamarinanao.

¹²Andriamanitra ô, misandrata Ianao hanerinerina any an-tampon’ny lanitra; aoka anie ny voninahitrao hamiratra amin’ny tany tontolo!