Read DIEM PROTESTANTA Salamo 62 Bible Online

Salamo 62 - DIEM PROTESTANTA bible

Salamo 62

¹Tao amin’ny tahirin-kiran’i Jedotòna [119] filohan’antoko-mpihira. Salamo nataon’i Davida.

²Andriamanitra irery no iadanako; avy aminy ny famonjena ahy.

³Izy irery no Vatolampy ahazoako famonjena, fiarovana avo ho ahy ka tsy hihontsona aho.

⁴— Ianareo kosa, mandra-pahoviana no hifarimbona hamely olona ka hiara-mioko handrodana azy ho toa rindrina mirona sy fefy mikoa?

⁵Ny hany itadiavanareo hanongana azy dia satria izy manana toerana ambony. Fitaka no zavatra mba maminareo: am-bava mirary soa, fa am-po manozona. Fiatoana

⁶Andriamanitra irery no iadanako satria Izy mihitsy no antenaiko.

⁷Izy irery no Vatolampy ahazoako famonjena, fiarovana avo ho ahy ka tsy hihontsona aho.

⁸Miankina amin’Andriamanitra ny famonjena ahy sy ny voninahitro; Andriamanitra no Vatolampy ianteherako mafy sy fialofako.

⁹— Matokia Azy lalandava, ry vahoakany, atosahy eo anoloany ny fiahianareo fa Izy Andriamanitra no fialofantsika. Fiatoana

¹⁰Tsio-drivotra mandalo ihany ny sarambabem-bahoaka; rendrarendra foana koa ireo olona manan-kaja; raha indray atao amin’ny mizana izy roa tonta, dia maivana noho ny tsio-drivotra mandalo.

¹¹— Aza mitoky amin’ny fanaovana an-keriny, aza miankina amin’ny fangalarana. Raha mitombo fananana ianareo, aza mba miraiki-po amin’izany.

¹²Izao no tenin’Andriamanitra fandreko matetika: «Ahy ny hery!»

¹³— Tompo ô, Anao ihany koa ny fitiavana; sady Ianao no mamaly ny olona araka ny asa nataony avy[120].