Read DIEM PROTESTANTA Salamo 68 Bible Online

Salamo 68 - DIEM PROTESTANTA bible

Salamo 68

¹Tao amin’ny tahirin-kiran’ny filohan’antoko-mpihira. Salamo nataon’i Davida. Tononkira.

²Hirotsaka hamely anie Andriamanitra ka ny fahavalony dia hiparitaka, ny mpankahala handositra lavitra Azy!

³Toy ny fielin’ny setroka no aoka ho fieliny; tahaka ny savoka mitsonika amin’ny afo no aoka hahalevona ny olon-dratsy eo anatrehan’Andriamanitra!

⁴Ny olo-marina kosa anie hifaly sy hiravo ary dia hibita-kafaliana eo anoloany!

⁵Mihirà ho fanajana an’Andriamanitra, mankalazà ny anarany amin’ny salamo mba hanoman-dalana ho fandraisana an’ilay mpitaingin-drahona ho kalesy. Ny Tompo no anarany ka mifalia eo anoloany[126].

⁶Andriamanitra ao an-Toeramasiny no ilay Ray miahy ny kamboty sy manome rariny ny mpitondratena.

⁷Ny manirery omeny ankohonana, ny voagadra avoakany ho afaka. Ny mpikomy ihany no hitoetra any amin’ny tany karankaina.

⁸Andriamanitra ô, fony Ianao niainga mba hialoha ny vahoakanao ka namakivaky izany taniefitra, Fiatoana

⁹dia nihovotrovotra ny tany[127], nanorana koa ny habakabaka teo anoloanao, ry Andriamanitr’i Sinay, teo anoloanao, ry Andriamanitr’i Israely.

¹⁰Ranonoram-pitahiana no narotsakao ka velombelona terỳ ilay taninao lany hery.

¹¹Tao ny vahoakanao no niorim-ponenana, fa izany no namboarinao ho an’ny ory satria tsara fo Ianao, Andriamanitra ô.

¹²Injao ny Tompo mandefa hafatra, ka dia zavon-tany ny vehivavy mitondra ny vaovao manao hoe[128]:

¹³«Samy vaky nandositra avokoa na mpanjaka na tafika fahavalo. Ireo vehivavy tavela tao an-trano dia mizarazara ny zavatra voababo.

¹⁴Na ianareo tsy mba niady aza fa nijanona niandry valan’ondry, dia ho tahaka ny voromahailala misy elany mirava-bolafotsy sy volony mirava-bolamena tsara.

¹⁵Fony Andriamanitra Tsitoha nanaparitaka ireo mpanjaka teo, dia ilay tendrombohitra hoe Salmôna[129] no indro nilatsahan’ny oram-panala.»

¹⁶Ny vohitr’i Basàna dia vohitra mideza; vohi-maro tendro ny vohitr’i Basàna.

¹⁷Kanefa nahoana, ry vohi-maro tendro, no ialonanao ilay vohitra voafidy, voafidin’Andriamanitra mba honenany? Eny, hitoetra ao mandrakizay ny TOMPO!

¹⁸Kalesy an’arivony aman’alina ireo kalesin’ny Tompo Andriamanitra; ka avy any an-tendrombohitra Sinay[130] Izy no mankao amin’ilay Toeramasina.

¹⁹Nitondra babo Ianao no niakatra eny an-kavoana; nandraisanao fanomezana ny olombelona[131] na dia ireo mpikomy taminao koa aza mba honenanao eo, ry TOMPO Andriamanitra.

²⁰Hisaorana isan’andro isan’andro anie ny Tompo, ilay Andriamanitra mpamonjy miahy antsika! Fiatoana

²¹Andriamanitra mahavonjy ilay Andriamanitsika. Eny, ilay ANDRIANANAHARY Tompo no afa-manala, afa-manala antsika amin’ny fahafatesana.

²²Ny lohan’ny fahavalony kosa montsaniny, dia ireo lava volo mirehaka amin’ny ratsy.

²³Hoy ny Tompo hoe: «Ireo fahavalonao any Basàna hampodîko, ny any an-kibon-dranomasina koa hampodîko,

²⁴ka ny tongotrao no hanosihosy ny rany ary hilelaka amin’izany koa ny alikanao[132].»

²⁵Ry ilay Andriamanitro Mpanjakako ô, marevaka ny dianao ho any an-Toeramasina.

²⁶Ny mpihira no indreo fa lohalalana, ny mpitendry valiha no vodilalana; ny eo anelanelan’izy roa tonta dia ny tovovavy mively langoroana.

²⁷Misaora an’Andriamanitra, ry vahoakany tafangona; misaora Azy TOMPO, ry terak’i Israely.

²⁸I Benjamîna, ilay foko bitika indrindra no eo aloha; dia ny andrian’i Joda izay mareva-pitafiana, avy eo indray dia ny andrian’i Zebolòna, ary ny an’i Naftalỳ no manaraka an’ireo.

²⁹Ry Andriamanitra ô, omeo baiko ny herinao ka hamafiso hatrany izay efa vitanao ho anay,

³⁰avy ao amin’ny tempolinao any Jerosalema izay itondran’ireo mpanjaka fanatitra ho Anao.

³¹Rahòny i Ejipta, ilay biby anaty bararata; rahòny ilay andian’ombilahy, dia ireo mpifehy vahoaka: aoka ireo hikoy hitondra volafotsy ho Anao; ataovy mihahaka kosa ireo vahoaka liana ady.

³²Ho avy aminao ny andriandahin’i Ejipta; hananty tanana aminao ny Etiôpianina.

³³Ianareo fanjakana eto an-tany, mihirà ho fanajana an’Andriamanitra; miredòna salamo ho an’ny Tompo, Fiatoana

³⁴Ilay toa mitaingina kalesy eo an-tampon’ny lanitra fahagola. Injao Izy mamoaka ny feony, dia feo midoboka mahery[133].

³⁵Koa ekeo fa an’Andriamanitra ny hery: mifehy an’i Israely ny fiandrianany ary miery ao anaty rahona ny heriny.

³⁶Mampitolagaga tokoa Andriamanitra miseho avy ao amin’ilay Toeramasiny. Izy no Andriamanitr’i Israely, manome hery sy tanjaka ny vahoakany. Hisaorana anie Andriamanitra!