Read DIEM PROTESTANTA Salamo 72 Bible Online

Salamo 72 - DIEM PROTESTANTA bible

Salamo 72

¹Tao amin’ny tahirin-kiran’i Salômôna. Andriamanitra ô, omeo ny mpanjaka izany fahaizanao mitsara; omeo ity taranak’andriana izany fitandroanao ny rariny.

²Aoka hoentiny ara-drariny sy hitsiny ireo malahelonao, dia ny vahoakanao.

³Koa fanambinana sy rariny ho an’ny vahoaka anie no hovokarin’ny tendrombohitra sy ny havoana!

⁴Homeny rariny sy hovonjeny anie ny malahelo sy ny mahantra amin’ny vahoaka, fa ny mpamoritra kosa hopotehiny!

⁵Enga anie ity mpanjaka ity sy ireo taranany haharitra mandritra ny taona mifandimby, raha mbola hamiratra koa ny masoandro ary mbola hanazava koa izany volana!

⁶Aoka izy ho tahaka ny erika mifafy amin’ny vilona, ho tahaka ny oram-baventy manondraka ny tany!

⁷Amin’ny androny anie dia hamony ny rariny ary hiroborobo mandavantaona ny fiadanana!

⁸Aoka izy hanjaka hatreo amin’ny ranomasina ka hatrany amin’ny ranomasina hafa[143], ary hanjaka manomboka amin’ny ony Eofrata ka tafapaka amin’ny faran’ny tany!

⁹Ny mpanohitra azy handohalika eo anoloany ary ny fahavalony hihohoka am-bovoka.

¹⁰Ny mpanjakan’i Tarsisy[144] sy ny an’ireo nosy dia handefa fanomezana ho azy; ny mpanjakan’i Sabà sy ny an’i Sebà[145] kosa ho avy handoa hetra aminy.

¹¹Ny mpanjaka hafa rehetra hiankohoka eo anatrehany; ary ny firenen-drehetra hanompo azy.

¹²Eny, hafahan’ity mpanjaka ity ny mahantra miantso vonjy aminy sy ny ory tsy mba manan-kanampy.

¹³Hangorahany ny osa sy mahantra ka hovonjeny ny ain’izy ireo,

¹⁴hotsoahany amin’ny fampahoriana sy amin’ny fanaovana an-keriny satria sarobidy eo imasony.

¹⁵Ho ela velona anie ny mpanjaka! Aoka ho volamena avy any Sabà no hatao fanomezana ho azy! Enga anie izy harahim-bavaka lalandava sady horarîna soa isan’andro isan’andro!

¹⁶Hahavokatra vary betsaka anie ny tany; hatrany an-tampon-tendrombohitra aza no aoka hihondrahondra ny vokatra ka hilonjehitra toy ny any Libano ny salohy! Ary ny mponina isan-tanàna anie hiroborobo toy ny ahitra eny an-tsaha!

¹⁷Ny lazan’ny mpanjaka anie ho mandrakizay ka hitatra hatrany eto ambany masoandro! Izy anie ho fitahiana ireo fokon’ny tany tontolo ka hataon’ny firenena rehetra hoe: «Sambatra!»

¹⁸Hisaorana anie ny TOMPO Andriamanitr’i Israely, Ilay hany mahefa zava-mahagaga!

¹⁹Hisaorana mandrakizay anie ny anarany malaza; ary aoka ny tany tontolo ho henika ny voninahiny! Amen! Amen!

²⁰Tapitra eto ny tonombavak’i Davida zanakalahin’i Jisay.