Read DIEM PROTESTANTA Salamo 73 Bible Online

Salamo 73 - DIEM PROTESTANTA bible

Salamo 73

¹Salamo nataon’i Asafa [146]. Tsara mihitsy Andriamanitra amin’i Israely, dia amin’izay rehetra madio fo.

²Kanefa saika nibolisatra ny tongotro, kely foana dia solafaka ny diako.

³Fa nialona ny mpaniratsira aho raha nahita ny fahombiazan’ny olon-dratsy,

⁴satria tsy nisy mahory azy mandra-pahafatiny fa sady vaventy izy no matavy koa.

⁵Tsy mba mahakasika azy akory ny fahorian’ny olona; ary tsy mba voakapoka miaraka amin’ny hafa izy.

⁶Ny fireharehana no iambozonany toy ny rojo; ary ny herisetra no itafiany toy ny lamba.

⁷Ny masony mila ho difotry ny taviny, nefa tazana eo tsara izay kendren’ny fony.

⁸Maneso izy sady miresaka zava-doza, ary mirehareha erỳ miresaka famoretana.

⁹Misoka-bava hamely an’Andriamanitra any an-danitra izy ary manao teny manodoka mahatety ny tany.

¹⁰Noho izany, na dia ny vahoakan’Andriamanitra aza dia lasa mirona mankany amin’ireo ary migoka ny teniny toa rano fisotro.

¹¹Hoy izy hoe: «Tsy mahalala na inona na inona Andriamanitra; tsy mahalala ny ataontsika ilay Avo Indrindra.»

¹²Jereo ireny olon-dratsy ireny: mahomby mandrakariva, mitombo harena.

¹³Hay very maina izany ny nanadiovako ny foko sy nanasako ny tanako ho tsy manan-tsiny[147]!

¹⁴Voakapoka tontolo andro aho ary faizina isa-maraina.

¹⁵Raha izay aho no tapa-kevitra hiteny tahaka azy, dia ho lasa mpamadika an’ireo anisan’ny zanakao.

¹⁶Nieritreritra aho ka niezaka hahatakatra; kinanjo sarotra tamiko ny hahita mazava,

¹⁷mandra-piditro tao amin’ny Toeramasinao, ka nahatakarako ny anjara miandry ireo olon-dratsy.

¹⁸Hay ve ka napetrakao amin’ny kisilasila izy ireny mba hanjeranao azy any amin’ny faharavana!

¹⁹Oadray! Fongana indray mipi-maso izy, levona matin’ny horohoro tampoka.

²⁰Tompo ô, rehefa mifoha homba ahy Ianao, dia ho levona ireny toy ny ahalevonan’ny nofin’ny olona rehefa taitra izy.

²¹Fony aho feno alahelo ka tohina mafy tato anatiko,

²²dia ketrina aho fa tsy nahalala na inona na inona; eny, toy ny biby tsy manan-tsaina aho teo anatrehanao.

²³Kanefa niaraka taminao mandrakariva aho, ary notantananao tamin’ny tanako ankavanana.

²⁴Ny torohevitrao no itarihanao ahy; avy eo aho dia horaisinao ho any amin’ny voninahitrao.

²⁵Any an-danitra, iza moa no ahy afa-tsy Ianao? Etỳ an-tany, inona indray no irîko fa efa manana Anao aho?

²⁶Mety hihareraka ny nofoko sy ny foko, fa Ianao kosa, Andriamanitra ô, no aroko sy anjarako mandrakizay.

²⁷Indro very izay mihataka aminao ary aringanao izay rehetra mandao Anao.

²⁸Fa izaho kosa, ny mahasambatra ahy dia ny ho eo akaikinao, Andriamanitra ô; Ianao Tompo ANDRIANANAHARY no nataoko fialofana hahazoako manambara ny asa rehetra vitanao.