Read DIEM PROTESTANTA Salamo 74 Bible Online

Salamo 74 - DIEM PROTESTANTA bible

Salamo 74

¹Tononkalo fananarana nataon’i Asafa [148]. Andriamanitra ô, nahoana izahay no dia narianao tanteraka? Nahoana izahay andian’ondry fiandrinao no irehetan’ny fahatezeranao?

²Tsarovy ilay vahoakanao izay efa azonao hatramin’ny ela, dia ireo foko navotanao ho fanananao; tsarovy ny tendrombohitra Tsiôna izay nataonao fonenana.

³Avia Ianao hijery ireo rava hatry ny ela, fa nosimban’ny fahavalo avokoa ny zavatra tanatin’ny toerana masina.

⁴Tao amin’ny faritra fihaonana aminao no nihorakorahan’ireo olona mpandrafy Anao ary nametrahany ny fanevany ho mari-pandresena.

⁵Ny fisehony tao dia toy ny mpikapa hazo manainga famaky hitevy ala mikitroka,

⁶ary nopotehiny tamin’ny famaky sy ny kanonta avokoa na ny rafitra na ny sokitra tamin’izay.

⁷Nodorany ilay Toeramasinao; ary nazerany sy nozimbainy ilay trano anajanay Anao.

⁸Hoy izy ireo anakampony hoe: «Aoka hampahorîntsika izy rehetra; ary aoka hodorantsika avokoa ny toeram-pivavahana eto amin’ny tany!»

⁹Tsy hitanay intsony ny mariky ny fanatrehanao, tsy misy mpaminany intsony; ary tsy misy aminay mba mahalala izay mbola haharetan’izao toe-javatra izao.

¹⁰Andriamanitra ô, mandra-pahoviana no hiteny ratsy Anao ny mpandrafy anay? Ary moa ny fahavalonay ve dia tsy hitsahatra hanamavo Anao?

¹¹Nahoana ny tananao ankavanana no nahemotrao ary fihininao mafy tsy hamonjy anay?

¹²Kanefa Andriamanitra ô, Mpanjakanay hatrizay hatrizay Ianao, mpanao famonjena eto anivon’ny tany.

¹³Mampisaraka ny ranomasina tamin’ny herinao Ianao, namakivaky ny lohan’ny dragona teny ambony ranobe,

¹⁴nanapotika ny lohan’izany fanany goavana izany[149] ka nanome ny tenabeny hohanin’ny antsantsa.

¹⁵Nanokafanao lalana ny loharano sy ny sakeli-drano, ary nataonao tankina ny ony tsy mety ritra.

¹⁶Anao ny andro, Anao koa ny alina fa Ianao no nahary ny masoandro amam-bolana.

¹⁷Ianao no nametra ny faritra rehetra amin’ny tany, Ianao koa no nanao ny fahavaratra sy ny ririnina.

¹⁸TOMPO ô, izao no mba tsarovy: miteny ratsy Anao ny fahavalo, manamavo Anao io firenena adala io.

¹⁹Aza atolotra an’ireo bibidia ireo ny ain’ilay domohina malalanao; aza hadinoina na oviana na oviana ny fiainan’ireo olo-mahantranao.

²⁰Hevero ny fanekempihavanana nataonao, satria feno olona iharan’ny herisetra ireo fiafenana rehetra ato amin’ny tany.

²¹Aza avela hiverina amin-kenatra izay nampahorîna; aoka kosa ny mahantra sy ny malahelo hidera Anao!

²²Andriamanitra ô, mirotsaha an-tsehatra hiandraikitra ny adinao; tsarovy fa ireo adala ireo dia miteny ratsy Anao isan’andro.

²³Aza hadinoina ny tabataban’ireo mpandrafy Anao, dia ny horakoraka izay ataon’ireo mpanohitra Anao ka tsy mitsahatra miakatra any aminao.