Read DIEM PROTESTANTA Salamo 75 Bible Online

Salamo 75 - DIEM PROTESTANTA bible

Salamo 75

¹Tao amin’ny tahirin-kiran’ny filohan’antoko-mpihira. Hohiraina araka ny feon’ny hoe: «Aza ravana...[150]». Salamo nataon’i Asafa. Tononkira.

²Andriamanitra ô, midera Anao izahay; eny, midera Anao tokoa izahay. Ataonay antso avo ny lazanao[151] ary tantarainay ny zava-mahagaga vitanao.

³Hoy ny Tompo hoe: «Amin’ny fotoana hotondroiko dia hanao fitsarana araka ny hitsiny Aho.

⁴Hihorohoro ny tany mbamin’ireo mponina eo aminy, nefa Izaho mbola hihazona ny andry iorenany.» Fiatoana

⁵Hoy aho aminareo mpirehareha hoe: «Aoka izay ny fireharehànareo!»; ary aminareo olon-dratsy hoe: «Aza miandranandrana intsony!

⁶Eny, aza miandranandrana intsony; aza mafy hatoka miteniteny foana.

⁷Fantaro fa ny didim-pitsarana havoaka dia tsy avy any atsinanana na avy any andrefana, tsy avy any avaratra na avy any atsimo;

⁸satria Andriamanitra no mpitsara, ka mampietry ny sasany Izy ary manandratra ny hafa kosa.»

⁹Misy tsangambava iray eo an-tanan’ny TOMPO, dia tsangambava feno divay mifangaroharo izay tandindon’ny hatezerany mandroatra. Asainy sotroin’ny olon-dratsy rehetra amin’ny tany izany ka tsy maintsy trohin’ireo hatramin’ny faikany[152].

¹⁰Izaho kosa tsy hitsahatra hanambara izany, ka dia ilay Andriamanitr’i Jakôba no hankalazaiko amin-kira hoe:

¹¹«Hopotehiny avokoa ny fahefàn’ny olon-dratsy fa hasandrany kosa ny fahefàn’ny olo-marina.»