Read DIEM PROTESTANTA Salamo 76 Bible Online

Salamo 76 - DIEM PROTESTANTA bible

Salamo 76

¹Tao amin’ny tahirin-kiran’ny filohan’antoko-mpihira. Hampiarahina amin’ny valiha. Salamo nataon’i Asafa. Tononkira.

²Fantatra eo amin’i Joda Andriamanitra; lehibe eo amin’i Israely ny lazany.

³Ao Salema[153] ny trano itoerany ary ao Tsiôna ny fonenany.

⁴Tao no namotehany ny fitaovam-piadiana, dia ny tsipîka manelatra sy ny ampinga ary ny sabatra. Fiatoana

⁵Andriamanitra ô, mahatahotra Ianao, avo manerinerina noho ny tendrombohitra fahagola[154].

⁶Voaroba mbamin’ny miaramila mahery fo, satria renoky ny torimaso ireo; ankona tsy nahahetsika avokoa ireny lehilahy matanjaka ireny[155].

⁷Ry Andriamanitr’i Jakôba ô, nandrahona Ianao ka nitsatoka teo ny soavaly sy ny mpitaingina azy.

⁸Eny, mahatahotra tokoa Ianao! Ka iza no hahajanona eo anoloanao, rehefa mipoaka ny fahatezeranao?

⁹Avy any an-danitra no amoahanao didim-pitsarana; Andriamanitra ô, raiki-tahotra ny tany ka mangina,

¹⁰fony Ianao nitsangana hilaza ny fanapahan-kevitrao hamonjy ny malahelo rehetra eto amin’ny tany. Fiatoana

¹¹Na dia ny fahatezeran’i Edôma aza dia hanjary fiderana Anao; ary ny olona sisa tavela any Hamata dia hataonao manaiky Anao.

¹²Manaova voady amin’ny TOMPO Andriamanitrareo, ary efao aminy izany; ianareo firenen-drehetra manodidina, mitondrà fanatitra ho an’ilay Andriamanitra mahatahotra;

¹³fa Izy no mampiato ny reharehan’ireo andriana sady mampahatahotra an’ireo mpanjakan’ny tany.