Read DIEM PROTESTANTA Salamo 79 Bible Online

Salamo 79 - DIEM PROTESTANTA bible

Salamo 79

¹Salamo nataon’i Asafa. Andriamanitra ô, nidiran’ireo hafa firenena ny taninao ka nozimbazimbainy ny tempolinao masina ary nataony korontam-bato i Jerosalema[186].

²Ny fatin’ny mpanomponao, eny, ny nofon’ireo mpivavaka aminao, dia nomeny ho sakafon’ny papango ary natsipiny hohanin’ny bibidia.

³Ny ran’ireo mpanomponao dia nataony mandriaka toy ny rano manerana an’i Jerosalema, ka tsy misy olona tavela handevina[187].

⁴Tonga fandatsan’ny vahoaka hafa izay mpifanila aminay izahay, zary fihomehezana sy faneso ho an’ireo firenena manodidina anay.

⁵TOMPO ô, mandra-pahoviana izahay no hitananao ny fahatezeranao sy ity fahasarotam-piaronao izay mandoro tahaka ny afo?

⁶Aoka ireo firenen-kafa no hotezeranao, dia ireo firenena tsy mahalala Anao, ireo fanjakana tsy mivavaka aminao,

⁷fa norobainy ny taranak’i Jakôba ary nosimbàny ny tany fonenany.

⁸Aza tsaroana hamelezana anay ny heloka vitan’ireo talohanay; fa aoka ny famindramponao no ho tonga haingana hitsena anay, satria voa mafy tokoa izahay!

⁹Andriamanitra mpamonjinay ô, vonjeo izahay noho ny voninahitrao; mba avelao re ny fahotanay, ka afaho izahay noho ny lazanao.

¹⁰Nahoana ny firenen-kafa no hanontany hoe: «Aiza àry izay Andriamanitrareo[188]?» Aoka ho fantany sy hohitanay fa valianao ny ran’ireo mpanomponao izay novonoin’izy ireny ho faty!

¹¹Aoka ho tonga eo anatrehanao ny fitarainan’ireo voafonja! Araka ny haben’ny herinao no iarovy ny ain’ireo voaheloka ho faty.

¹²Tompo ô, mba valio impito heny amin’ireo firenena mifanila aminay ny fanalàm-baràka nataony Anao.

¹³Fa izahay vahoakanao, andian’ondry fiandrinao, dia hanolotra fisaorana Anao mandrakizay, hanambara ny fiderana Anao hatrany hatrany.