Read DIEM PROTESTANTA Salamo 80 Bible Online

Salamo 80 - DIEM PROTESTANTA bible

Salamo 80

¹Tao amin’ny tahirin-kiran’ny filohan’antoko-mpihira. Hampiarahina amin’ny gitara. Salamo fahatsiarovana nataon’i Asafa[189].

²Ry Mpiandry an’i Israely ô, mba mihainoa anay, Ianao Izay mitarika ny taranak’i Jôsefa toy ny andian’ondry; Ianao Izay mipetraka eo ambony kerobima[190], mba misehoa.

³Eo anatrehan’i Efraîma sy i Benjamîna ary i Manase, fohazy ny herinao ka tongava hamonjy anay.

⁴Ry Andriamanitr’izao rehetra izao ô, mba avereno ho firenena matanjaka izahay; aoka hijery anay amin-kamorampo Ianao, dia ho voavonjy izahay!

⁵Ry TOMPO Andriamanitr’izao rehetra izao ô, mandra-pahoviana no hotezeranao izahay ho setrin’ny vavakay vahoakanao?

⁶Alahelo no zary sakafo afahanao anay, ranomaso mandriaka no ampisotroinao anay.

⁷Ataonao ho fanarabin’ireo firenen-kafa izay mpifanila aminay izahay sy ho fihomehezan’ny fahavalonay.

⁸Ry Andriamanitr’izao rehetra izao ô, mba avereno ho firenena matanjaka izahay; aoka hijery anay amin-kamorampo Ianao, dia ho voavonjy izahay!

⁹Namindra voaloboka[191] iray avy any Ejipta Ianao ary nandroaka firenen-kafa mba hambolena azy;

¹⁰nodiovinao ny tany teo anoloany, koa namaka lalina izy ary nameno ny tany.

¹¹Ny alokalony naharakotra ny tendrombohitra any atsimo ary ny rantsany nananika ny sedera goavana any Libano;

¹²nampisandrahaka ny rantsany hatrany an-dranomasina any andrefana izy, ary nampihanaka ny sakeliny hatrany amin’ny ony any atsinanana.

¹³Nahoana àry no dia noravanao ny fefy manodidina an’ilay voalobokao, ka mioty azy ny mpandalo rehetra?

¹⁴Manimba azy toa lambo avy any an’ala ireo ary tonga miraoka azy toa bibidia.

¹⁵Ry Andriamanitr’izao rehetra izao ô, mba miverena; tsinjovy avy any an-danitra ka jereo ary karakarao ilay voalobokao:

¹⁶arovy ilay zana-kazo nambolenao, ilay solofo nohatanjahinao ho Anao.

¹⁷Aoka ho levon’ny fandrahonanao ireo fahavalo nanjera sy nandoro!

¹⁸Aoka homban’ny fiarovanao ilay vahoaka voafidinao[192], dia ilay firenena nohatanjahinao ho Anao!

¹⁹Amin’izay dia tsy handao Anao intsony izahay; Ianao no hamelona anay indray ary hivavahanay.

²⁰Ry TOMPO Andriamanitr’izao rehetra izao ô, mba avereno ho firenena matanjaka izahay; aoka hijery anay amin-kamorampo Ianao, dia ho voavonjy izahay!