Read DIEM PROTESTANTA Salamo 86 Bible Online

Salamo 86 - DIEM PROTESTANTA bible

Salamo 86

¹Vavaka nataon’i Davida. TOMPO ô, mba atongilano ny sofinao ka valio aho fa ory sy mahantra.

²Arovy ny aiko fa mpivavaka aminao aho. Mpanomponao aho ka matoky Anao, vonjeo aho fa Ianao no Andriamanitro.

³Tompo ô, mba iantrao aho fa miantso Anao tontolo andro.

⁴Ampifalio re aho mpanomponao satria Ianao, Tompo ô, no ifantohako.

⁵Tompo ô, Ianao no tsara fo sady mpamela heloka, be fitia amin’izay rehetra miantso Anao.

⁶Mba henoy, TOMPO ô, ny vavaka ataoko; ka ho tandrinao anie ny fitarainako.

⁷Amin’ny androm-pahoriako, Ianao no antsoiko satria mamaly ahy.

⁸Tompo ô, tsy misy tahaka Anao amin’ireo andriamanitra; tsy misy mahavita ny vitanao.

⁹Ianao no namorona ny firenen-drehetra, ka ho avy hiankohoka eo anatrehanao izy ary hanome voninahitra Anao, Tompo ô[207],

¹⁰fa lehibe Ianao sy manao zava-mahagaga; Ianao ihany no tena Andriamanitra.

¹¹TOMPO ô, toroy ny lalanao aho mba handehanako araka ny fahamarinanao, ataovy tokam-po aho mba hankatò Anao.

¹²Tompo Andriamanitro ô, hoderaiko amin’ny foko manontolo Ianao ary homeko voninahitra mandrakizay,

¹³satria lehibe ny fitiavanao ahy; fa izaho no efa nafahanao tsy ho lasa any an-davaka, any amin’ny toeran’ny maty any.

¹⁴Olona mpiavonavona no mitsangan-kamely ahy andian’olon-dozabe no mitady hahafaty ahy; Ianao, Andriamanitra ô, tsy raharahainy akory.

¹⁵Kanefa Ianao, Tompo ô, dia Andriamanitra mamindrafo sy miantra, mahari-po sady be fitiavana amam-pahamarinana[208].

¹⁶Mba itodiho aho ka iantrao; omeo ahy mpanomponao ny herinao, ary vonjeo aho fa voatokana ho Anao.

¹⁷Omeo porofo aho fa tsara fo Ianao; dia ho menatra ireo mpankahala ahy, rehefa mahita fa Ianao, TOMPO ô, no mamonjy sy mampionona ahy.