Read DIEM PROTESTANTA Salamo 92 Bible Online

Salamo 92 - DIEM PROTESTANTA bible

Salamo 92

¹Salamo. Tononkira fanao amin’ny andro sabata.

²Tsara ny midera Anao, TOMPO ô, sy ny mankalaza Anao an-kira, ry ilay Andriamanitra Avo Indrindra,

³ka manambara ny fitiavanao raha vao maraina ary ny fahamarinanao mandritra ny alina,

⁴amin’ny valiha torifolo sy amin’ny feon-dokanga.

⁵Mahafaly ahy ny asanao, TOMPO ô, ary manao horakora-pihobiana aho manoloana ireo zavatra vitanao.

⁶Lehibe tokoa izay nataonao, TOMPO ô, ary lalina aoka izany ny fisainanao!

⁷Ny ketrina no tsy mahalala izany ary ny adala no tsy mahatsapa.

⁸Na manorobona toy ny ahitra aza ny olon-dratsy ka mamony avokoa ny mpanao ny tsy rariny, dia ny mba haringana mandrakizay.

⁹Ianao, TOMPO ô, no ambony indrindra ka mitoetra ho mandrakizay!

¹⁰Ireo fahavalonao kosa, TOMPO ô, eny, ireo fahavalonao dia ho levona ireo mpanao tsy an-drariny hiparitaka avokoa.

¹¹Nomenao ahy ny tanjaky ny ombimanga, nandrarahanao menaka mbola vao aho[222].

¹²Hitako ny faharesen’ireo mpifanandrina amiko, ary reko ny fikaikaikan’ireo mpisetrasetra ahy.

¹³Fa ny olo-marina kosa hamololona toy ny rofia, hisandrahaka toy ny sederan’i Libano:

¹⁴Toy ny hazo ambolena eo an-tokotanin’ny tempoly izy ka mivelatra eo an-kianjan’ny TOMPO Andriamanitsika;

¹⁵sady, na antitra aza, dia mamoa hatrany ary mbola maitso sy milenodenoka;

¹⁶izany no porofo fa mahitsy ny TOMPO, ary tsy misy olakolaka ao amin’ilay Mpiaro ahy.