Read DIEM PROTESTANTA Salamo 97 Bible Online

Salamo 97 - DIEM PROTESTANTA bible

Salamo 97

¹Ny TOMPO no mpanjaka: miravoa, ry tany tontolo; mifalia, ry mponina amin’ny nosy maro.

²Rahona sy zavona mikitroka no manodidina Azy; rariny sy hitsiny no iorenan’ny fanjakany[230].

³Misy afo mandeha mialoha Azy ka mandevona ny fahavalony eny manodidina.

⁴Mahazava izao tontolo izao ny tselany; mahita izany ny tany ka dia mangovitra.

⁵Miempo toy ny savoka ny tendrombohitra eo anoloan’ilay TOMPOn’ny tany tontolo;

⁶manambara ny fahamarinany ny lanitra ary mahita ny voninahiny ny firenen-drehetra.

⁷Aoka ho menatra izay rehetra manompo sampy sy mirehareha amin’ny zavatra tsinontsinona! Aoka hiankohoka eo anoloan’ny Tompo ianareo andriamanitra rehetra!

⁸Mandre izany i Tsiôna ka miravo; ireo tanànan’i Joda mifaly noho ny fifehezanao, TOMPO ô,

⁹satria IANAO no Ilay Avo Indrindra eran-tany sady ambonin’ireo andriamanitra rehetra.

¹⁰Ianareo fatra-pitia ny TOMPO, mankahalà ny ratsy fa miaro ny ain’ireo mpivavaka aminy Izy ka manafaka azy tsy ho voatanan’ny olon-dratsy.

¹¹Misy hazavana mamiratra ho an’ny olo-marina, ka mitondra haravoana izany ho an’ny mahitsy fo.

¹²Mifalia ao amin’ny TOMPO, ianareo olo-marina; manaova fiderana Azy ka tsarovy fa masina Izy.