Read DIEM PROTESTANTA Salamo 99 Bible Online

Salamo 99 - DIEM PROTESTANTA bible

Salamo 99

¹Ny TOMPO no mpanjaka, hany ka mangovitra ireo vahoaka. Ambony kerobima ny sezafiandrianany, hany ka mihorohoro ny tany.

²Lehibe ao Tsiôna ny TOMPO, avo ambonin’ny firenena rehetra Izy.

³Aoka ireo hidera ny anaranao izay lehibe sy mampitolagaga, satria masina tokoa Ianao!

⁴Ry mpanjaka mahery sy tia rariny ô, Ianao no nampiorina ny hitsiny sady niantoka ny rariny sy ny fitsarana teo amin’ny taranak’i Jakôba.

⁵Asandrato ny TOMPO Andriamanitsika; Izy no masina ka iankohofy eo anoloan’ny fitoeran-tongony[231].

⁶I Mosesy[232] sy i Aharôna[233] tamin’ireo mpisorony ary i Samoela[234] tamin’ireo mpivavaka aminy dia samy niantso vonjy taminy ka novaliany.

⁷Tao anaty andry rahona ny Tompo[235] no niteny tamin’ny vahoakany; dia nankatoavin’ireo ny baikony mbamin’ny fitsipika nomeny azy.

⁸TOMPO Andriamanitray ô, Ianao mihitsy no mamaly azy; fa Andriamanitra nahari-po taminy Ianao, nefa kosa nanafay azy noho ny ratsy nataony[236].

⁹Asandrato ny TOMPO Andriamanitsika; eny, masina ny TOMPO Andriamanitsika ka iankohofy eo an-tendrombohiny masina[237].