Read DIEM PROTESTANTA Ohabolana 15 Bible Online

Ohabolana 15 - DIEM PROTESTANTA bible

Ohabolana 15

¹Famaliana am-pitiavana mampitony hatezerana; fa teny mitratreva kosa mahatonga havinirana.

²Ny fitenin’ny hendry manosaka fahalalana mahasoa; fa ny vavan’ny adala kosa mampiely fahadalana.

³Ny mason’ny TOMPO dia mijery eny rehetra eny ka mahita ny ratsy fanahy sy ny tsara fanahy.

⁴Ny teny mamy dia mitondra aina; fa ny vava ratsy kosa mandrera-po[45].

⁵Ny adala manamavo ny fananaran-drainy; fa izay mandray tsikera no hita ho hendry.

⁶Harem-be no ao an-tranon’ny olo-marina; fa mampiahiahy kosa no harikaren’ny olon-dratsy.

⁷Ny tenin’ny hendry mampiely fahalalana; fa hafa noho izany kosa ny fon’ny adala.

⁸Halan’ny TOMPO ny sorona aterin’ny olon-dratsy; fa sitrany kosa ny vavaky ny olo-mahitsy.

⁹Halan’ny TOMPO ny fitondrantenan’ny olon-dratsy; fa tiany kosa ny mpandala ny fahamarinana.

¹⁰Hofaizina mafy izay mandao ny toetra tsara, fa ho faty tokoa izay mankahala anatra.

¹¹Fantatry ny TOMPO na dia izay miseho any amin’ny toeran’ny maty aza; koa mainka fa ny ao am-pon’ny olona.

¹²Tsy tian’ny mpaniratsira ny hotsikeraina, ka izany no tsy mba anatonany ny olon-kendry.

¹³Ny fo falifaly mahamiran-tava; fa ny fo malahelo maharera-panahy.

¹⁴Ny manan-tsaina mikatsaka fahalalana; fa ny adala kosa miletra fahadalana.

¹⁵Ratsy avokoa ny andron’ny olona ory; fa fety lava kosa ny fiainan’ny olona sambatra.

¹⁶Aleo manan-kely ombàm-panajana ny TOMPO, toy izay manan-karembe difotra ahiahy.

¹⁷Aleo mihinana anana ombàm-pitiavana, toy izay hena matavy laroam-pankahalana.

¹⁸Ny olona mora tezitra no mihantsy ady; fa izay mahatsindry fo kosa mampitony fifandirana.

¹⁹Ny lalan’ny kamo dia feno korontan-tsilo; fa ny lalan’ny olo-marina kosa milamina tsara.

²⁰Ny zanaka hendry mahafaly ny rainy; fa ny zanaka adala manamavo ny reniny.

²¹Ny fahadalana no mahafaly ny olona tsy ampy saina; fa ny manan-tsaina kosa mahitsy fitondrantena.

²²Foana ny fikasana tsy ampy mpanolotsaina; fa tanteraka kosa izany, raha maro ireny.

²³Fifaliana ho an’ny olona ny fahaiza-mamaly; ary fatratra ny teny atao amin’ny ilana azy.

²⁴Ny lala-miakatra ho amin’ny fiainana no alehan’ny hendry ka idifiany ny toeran’ny maty any ambany.

²⁵Ny tranon’ny mpiavonavona dia ravàn’ny TOMPO; fa arovany kosa ny tanin’ny mpitondratena.

²⁶Halan’ny TOMPO ny fikasan-dratsy; fa madio aminy kosa ny teny tsara atao.

²⁷Ny olona adalam-bola dia mampikorontana ny ankohonana; fa izay mankahala risoriso no ho velona.

²⁸Ny olo-marina mieritreritra vao mamaly; fa ny olon-dratsy kosa manely fanaratsiana.

²⁹Ny TOMPO manalavitra ny olon-dratsy, fa mihaino kosa ny vavaky ny olo-marina.

³⁰Ny endrika sariaka maharavo ny fo ary ny vaovao mahafaly mamelombelona ny aina.

³¹Izay manongilan-tsofina hihaino anatra mahavonjy no hiara-monina amin’ny olon-kendry.

³²Izay mandà anatra manamavo ny tenany, fa izay mihaino tsikera mahazo fahalalana.

³³Ny fanajana ny TOMPO dia fananaram-pahendrena[46]; ary tokony hanetry tena alohan’ny hisondro-boninahitra.