Read DIEM PROTESTANTA Ohabolana 19 Bible Online

Ohabolana 19 - DIEM PROTESTANTA bible

Ohabolana 19

¹Aleo mahantra mizotra ho olom-banona toy izay mpanankarena milaza lainga.

²Tsy tsara ny finiavana tsy ombàm-pahalalana; ary izay mirotoroto fandeha no ho tafintohina.

³Rehefa simban’ny hadalàny ny lalan’ny olona, dia ny TOMPO indray no itezeran’ny fony.

⁴Ny mpanankarena dia manan-tsakaiza maro; fa ny mahantra kosa mety hilaozan’ilay hany sakaizany.

⁵Tsy ho afa-maina ny vavolombelona mandainga; ary tsy ho dify famaizana ny mpamafy lainga.

⁶Maro no mandokadoka ny olona ambony; ary ny besinimaro dia sakaizan’ny mpanome zavatra.

⁷Ny ory tsy havan-drahalahy manana; koa mainka va tsy handao azy ny sakaizany? Fa na mbola miteny aminy aza ilay ory, dia efa tsy misy eo intsony ireo.

⁸Izay mianatra misaina no tia ny tenany ary izay mitandro fahaiza-manavaka no hahita fahasambarana.

⁹Tsy ho afa-maina ny vavolombelona mandainga, ary ho very ny mpamafy lainga.

¹⁰Tsy mety ho an’ny adala ny miaina ao amin’ny renty, koa mainka ny hibaikoan’ny mpanompo ireo lehibeny.

¹¹Ny olona hendry mahafehy ny hatezerany, ary voninahitra ho azy ny manadino ny ratsy nozakainy.

¹²Ny fahatezeran’ny mpanjaka dia mampatahotra toy ny fieron’ny liona; fa ny fitsimbinany kosa dia mahasoa toy ny ando amin’ny ahitra.

¹³Ny zanaka adala dia fahoriana ho an’ny rainy; ny vehivavy tia ady kosa dia toy ny fantsona tsy mitsaha-mitete.

¹⁴Trano aman-karena no lova avy amin-drazana; fa ny vady hendry kosa dia avy amin’ny TOMPO.

¹⁵Ny hakamoana maharendremana, ka ny kibon’ny malaina ho noana.

¹⁶Izay mitandro ny didy no miaro ny ainy; fa ho faty kosa izay tsy miraharaha ny toetrany.

¹⁷Izay manome ny mahantra dia mampisambotra ny TOMPO, fa Izy ihany no hanonitra ny soa nataon’ilay mpiantra.

¹⁸Faizo ny zanakao dieny mbola misy fanantenana; nefa aza sendaotra, fandrao mahafaty azy.

¹⁹Mendrika handoa sazy ny olona lozabe; fa raha tsy atao izany izy, dia vao mainka hamerina indray.

²⁰Henoy ny torohevitra ary raiso ny anatra mba hahatonga anao ho hendry any aoriana.

²¹Maro ny tetika ao am-pon’ny olona, fa ny fikasan’ny TOMPO ihany no tanteraka.

²²Ny fitiavan-karenan’ny olona dia henatra ho azy; fa aleo mahantra toy izay mpandainga.

²³Ny fanajana ny TOMPO mitondra ho amin’ny fiainana, fa izany no hananam-piadanana sy tsy hahitan-doza[54].

²⁴Ny kamo mangarom-bilia amin’ny tanany, nefa tsy mahatonga izany ao am-bavany.

²⁵Kapohy ny mpaniratsira, dia ho hendry ny kely saina; anaro ny manan-tsaina fa ho takany ny fahalalana.

²⁶Ny zanaka mahamenatra sy manala baràka dia mampahory an-drainy sy mampidifidify an-dreniny.

²⁷Anaka, raha mitsahatra tsy mandray anatra ianao, dia hanadino faingana izay nianaranao.

²⁸Ny vavolombelona tsy vanona manevateva ny fitsarana, ary ny olon-dratsy dia fatra-pitelina haratsiana.

²⁹Ny famaizana dia natao ho an’ny mpaniratsira, ary ny kapoka ho amin’ny lamosin’ny adala.