Read DIEM PROTESTANTA Ohabolana 25 Bible Online

Ohabolana 25 - DIEM PROTESTANTA bible

Ohabolana 25

¹Indreto koa no ohabolan’i Salômôna voaangon’ny olon’i Hezekià mpanjakan’i Joda.

²Andriamanitra dia omem-boninahitra noho Izy manao zava-miafina; ny mpanjaka kosa dia omem-boninahitra noho izy manazava ny zavatra ataony.

³Ny haavon’ny lanitra sy ny halalin’ny tany ary ny ao am-pon’ny mpanjaka dia samy tsy fantatsika.

⁴Esory amin’ny volafotsy ny lotony, dia fanaka sarobidy no havoakan’ny mpanefy;

⁵esory tsy ho eo amin’ny mpanjaka ny olon-dratsy dia fahamarinana no hiorenan’ny fiandrianany.

⁶Aza miedinedina eo anatrehan’ny mpanjaka na misolantsolana eny amin’ny toeran’ny lehibe;

⁷fa aleo ianao hilazana hoe: «Miakara etỳ», toy izay mahita ny tenanao haetry eo anatrehan’ny manan-kaja[69].

⁸Izay zavatra hitan’ny masonao[70], aza maika ny hitondra izany am-pitsarana, fandrao tsy hitanao izay hatao amin’ny farany rehefa voaporofon’ny namanao fa ianao no diso.

⁹Alamino miaraka amin’ny namanao ny adinao aminy, nefa aza tsikafonina ny tsiambaratelon’ny hafa;

¹⁰fandrao izay mandre hanome tsiny anao ka dia ho afa-baràka mandrakizay ianao.

¹¹Toy ny paoma volamena voahaingo volafotsy, no hasarobidin’ny teny lazaina amin’ny ilàna azy.

¹²Toy ny kavina sy rojo volamena no hasoan’ny anatry ny hendry amin’izay mihaino.

¹³Mamelombelona aina ny hatsiakan’ny rano mamanala amin’ny fotoam-pijinjana mafana; mamelombelona aina toy izany koa ny iraka mahatoky amin’ny tompony naniraka azy.

¹⁴Tahaka ny rahona sy rivotra tsy mitondra orana ny olona mampanantena zavatra izay tsy homeny akory.

¹⁵Izay manam-paharetana no maharesy lahatra mpitsara; ary ny teny malefaka mampilefitra ny henjana.

¹⁶Raha mahita tantely ianao, dia hano izay sahaza anao, fandrao ho leony ianao ka handoa azy;

¹⁷aoka ianao tsy hateti-pankany an-tranon’ny namanao, fandrao tofoka aminao izy ka hankahala anao.

¹⁸Mandratra toy ny langilangy na sabatra na koa zana-tsipîka maranitra ny olona mijoro ho vavolombelona mandainga mba hanamelohana ny namany.

¹⁹Toy ny mitsako amin’ny nify mihozongozona na mihazakazaka amin-tongotra kilemaina ny matoky olona mpamadika amin’ny androm-pahoriana.

²⁰Toy ny manary lamba amin’ny andro mangatsiaka na toy ny manisy vinaingitra amin’ny fery, toy izany koa izay mihira amin’olona malahelo[71].

²¹Raha noana ny fahavalonao, dia omeo hanina; raha mangetaheta izy, dia omeo rano hosotroiny;

²²fa raha manao izany ianao, dia toy ny manala vainafo eo an-dohany[72]. Ary ny TOMPO no hamaly soa anao.

²³Ny rivotra avy any avaratra mahatonga orana, ary ny fanendrikendrehana olona mahavinitra endrika azy.

²⁴Aleo mitoetra amin’ny efitra kely ao an-tampon-trano toy izay miray trano amin’ny vehivavy liana ady.

²⁵Toy ny rano mangatsiaka ho an’ny tenda main-ketaheta ny vaovao mahafaly avy any an-tany lavitra.

²⁶Toy ny loharano voaloto sy fantsakana voapoizina ny olo-marina milefitra eo anoloan’ny olon-dratsy.

²⁷Tsy tsara ny mihinana tantely be loatra na koa ny mitady hahazo voninahitra be loatra.

²⁸Toa tanàna rava tsy misy manda intsony ny olona izay tsy mahatsindry fo.