Read DIEM PROTESTANTA Ohabolana 26 Bible Online

Ohabolana 26 - DIEM PROTESTANTA bible

Ohabolana 26

¹Diso toerana toy ny oram-panala fahavaratra na orana amin’ny fotoam-pijinjana ny voninahitra omena ny adala.

²Manidina tsy tafapetraka ny fody sy ny sindintsidina; toy izany koa ny fanozonam-poana: tsy mba hihatra akory izany.

³Ny karavasy dia ho an’ny soavaly, ny lamboridy ho an’ny boriky ary ny tsorakazo ho an’ny lamosin’ny adala.

⁴Aza mamaly ny adala araka ny hadalany, fandrao mba adala tahaka azy koa ianao.

⁵Valio araka ny hadalany ny adala fandrao mihevi-tena ho hendry izy.

⁶Izay mampitondra hafatra ny adala dia toy ny olona manapa-tongotra ny tenany ka tonga miboboka fahavoazana.

⁷Ny ohabolana lazain’ny adala dia mikolepaka tahaka ny malemy tongotra.

⁸Toy ny mamatotra vato amin’ny antsamotady[73] ny manome voninahitra ny adala.

⁹Ny ohabolana lazain’ny adala dia toy ny tsilo hazonin’ny mamo.

¹⁰Ny mpampiasa manarama adala sendra mandalo dia mandratra ny olona rehetra.

¹¹Ny alika miverina amin’ny loany[74] ary ny adala miverina amin’ny hadalàny.

¹²Raha mahita olona mihevi-tena ho hendry ianao, dia ny adala no misy hantenaina kokoa noho izy.

¹³Hoy ny kamo: «Misy liona ao an-dalana, misy biby masiaka atsy an-dalambe.»

¹⁴Ny varavarana mihodina amin’ny saviliny ary ny kamo mivadibadika eo am-pandriany.

¹⁵Mangarona ny sakafo ao an-doviany ny kamo nefa mandreraka azy ny hampakatra izany ao am-bavany.

¹⁶Ny kamo dia mihevi-tena ho hendry mihoatra noho ny olona fito kinga famaly.

¹⁷Ny mpandalo izay misalovana amin’ny adin’ny hafa dia toy ny misambotra amboa amin’ny sofiny.

¹⁸Ny olona mamitaka ny namany ka manao aminy hoe: «Vazivaziko ihany izany,» dia tahaka ny olona adala mandefa forohana sy zana-tsipîka mahafaty.

²⁰Rehefa tsy misy kitay intsony, dia maty ny afo; ary rehefa tsy misy mpanendrikendrika intsony, dia mitsahatra ny fifandirana.

²¹Ny arina mitaiza vain’afo, ny kitay mitaiza afo ary ny olona liana ady mandrehitra fifandirana.

²²Toa hani-matsiro ny tenin’ny mpanendrikendrika ka any anaty kibo no mikorotsaka.

²³Toy ny ankoso-bolafotsy amin’ny tanimanga ny teny mandodoka manafina fo ratsy.

²⁴Teny mihatsaravelatsihy no ataon’ny mpankahala kanjo ny ao anatiny mikotrika fitaka;

²⁵koa na dia miteny amim-pitiavana aza izy, dia aza matoky azy fa feno rikoriko ny fony;

²⁶mahay manafim-pankahalana izy, nefa hiharihary am-pahibemaso ny haratsiany.

²⁷Izay mihady lavaka no ho latsaka ao ary izay manakodia vato no hikodiavany.

²⁸Ny mampahory olona amin’ny lainga dia fankahalana azy; ary ny teny mandokadoka no ahitan-doza.