Read DIEM PROTESTANTA Ohabolana 27 Bible Online

Ohabolana 27 - DIEM PROTESTANTA bible

Ohabolana 27

¹Aza mirehareha ny amin’ny ho ampitso ianao; fa izay hiseho anio aza tsy fantatrao akory[75].

²Aoka ny olon-kafa na ny vahiny no hidera anao, fa tsy ny tenanao no hisoka-bava hanao izany.

³Mavesatra ny vato ary manan-danja ny fasika; fa manoatra noho izy roa tonta ny lolom-pon’ny adala.

⁴Masiaka ny havinirana ary manafotra ny hatezerana, fa iza no mahajoro eo anoloan’ny fialonana?

⁵Aleo fampitandremana tsy misorona toy izay fitia afinafenina.

⁶Ny tsikera ataon-tsakaiza dia itokiana hahasoa fa ny oroky ny fahavalo kosa mamitaka[76].

⁷Izay voky tsy mahahinan-tantely fa izay noana kosa mankamamy sakafo mangidy.

⁸Toy ny vorona miriorio lavitry ny akaniny ny olona mirenireny lavitry ny fonenany.

⁹Ny menaka fanosotra sy ny ranomanitra dia mahafaly ny fo fa ny fahoriana mampisafotofoto ny fanahy.

¹⁰Aza mahafoy ny sakaizanao na ny naman-drainao. Raha tojo fahasahiranana ianao, aza mankany amin’ny rahalahinao, fa tsara kokoa ny mpifanila akaiky noho ny rahalahy lavitra.

¹¹Hendre, anaka, ary ampifalio ny foko mba hamaliako izay miteny ratsy ahy.

¹²Mahatsinjo ny loza ny malina ka miery, fa ny kely saina kosa mandroso ka voa.

¹³Raha misy olona sahy miantoka trosan’olona vahiny, dia tano ny akanjony ho antoka ny amin’io olon-tsy fantatra io.

¹⁴Izay manaitra namana vao maraina be satria niarahaba azy tamim-peo mahery dia tahaka ny manozona azy.

¹⁵Ny vehivavy tia ady dia toy ny fantsona izay tsy mitsaha-mitete amin’ny andro manorana,

¹⁶izay misakana azy dia toy ny misakan-drivotra na mamihina menaka amin-tanana ila.

¹⁷Ny vy no andranitana ny vy; dia toy izany koa ny olona ihany no andranitana ny sain’olon-kafa.

¹⁸Izay mikolokolo ny aviaviny hihinana ny voany ary izay mikarakara ny tompony homem-boninahitra.

¹⁹Tahaka ny itarafanao ny tandindonao anatin’ny rano no itarafanao ny tenanao anatin’ny fonao.

²⁰Tsy mba mety voky ny fonenan’ny maty ary tsy mba mety afa-po ny mason’olombelona.

²¹Misy ny memy fisedrana ny volafotsy ary ny fatana fandrendrehana ny volamena, fa ny lazany kosa no itsarana ny olona.

²²Na dia totoinao toy ny vary an-daona aza ny adala, dia tsy ho afaka aminy akory ny hadalàny.

²³Fantaro tsara ny toetoetry ny ondry aman’osinao ary tandremo fatratra ireo biby fiompinao;

²⁴satria ny harena akory tsy haharitra mandrakizay ary ny satroboninahitra tsy hateza hampitaina amin’ny taranaka mifandimby.

²⁵Tapaho ny ahitra eny an-tsaha, ka mandritra ny itsiran’ny solofony, dia angony ny vilo-maina eny an-tendrombohitra.

²⁶Manàna ondry hahazoanao fitafiana, manàna osilahy hahafahanao mividy saha;

²⁷ary hanome ronono be ny osivavinao ka hisy hamelomanao ny tenanao sy ny ankohonanao ary ny mpanompovavinao.