Read DIEM PROTESTANTA Ohabolana 29 Bible Online

Ohabolana 29 - DIEM PROTESTANTA bible

Ohabolana 29

¹Izay mafy hatoka tsy laitra anarina dia ho montsana tampoka tsy hisy fanafana.

²Rehefa ny olo-marina no mitondra[78], dia faly ny vahoaka; fa rehefa ny olon-dratsy no mifehy, dia misento ny vahoaka.

³Izay tia fahendrena no mahafaly ny rainy; izay miaraka amin’ny mpivarotena kosa mandany harena.

⁴Ny mpanjaka mpandala ny rariny no mampiorina mafy ny tany; fa izay mitaky hetra mihoa-pampana kosa no mampikorosy fahana izany.

⁵Izay olona mandodoka ny namany dia mamela-pandrika ho an’ny tenany[79].

⁶Ny olon-dratsy mamandri-tena amin’ny fahotany, fa ny olo-marina kosa mientanentan-kafaliana.

⁷Ny olo-marina mahafantatra ny zon’ireo mahantra, fa ny olon-dratsy kosa tsy manana fahalalana izany.

⁸Mampisavorovoro ny iray tanàna ny mpaniratsira, fa mampitony fahatezerana kosa ny hendry.

⁹Raha olon-kendry no manana ady amin’adala, dia ho tezitra na hihomehy ity adala, kanefa tsy hisy filaminana mihitsy.

¹⁰Ny olona lian-drà mankahala ny olom-banona, fa ny olo-mahitsy kosa miahy ny ainy.

¹¹Manampatra hatezerana ny adala, fa mahatsindry fo kosa ny hendry.

¹²Raha mihaino lainga ny mpitondra, ho tonga ratsy avokoa ny olom-peheziny.

¹³Izao no iraisan’ny mahantra sy ny mpampahory; samy omen’ny TOMPO maso hijerena izy roa tonta.

¹⁴Manamafy orina mandrakizay ny sezafiandrianany ny mpanjaka izay mitsara marina ny mahantra.

¹⁵Manome fahendrena ny tsorakazo sy ny fananarana, fa henatra ho an-dreniny kosa ny zaza avela hanaram-po.

¹⁶Raha maro ny olon-dratsy, dia mitombo ny heloka; fa olo-marina kosa ho vavolombelon’ny fianjerany.

¹⁷Faizo ny zanakao, dia hahafinaritra anao izy ary hanome fahafaham-po anao.

¹⁸Rehefa tsy misy fanambaràn’ny mpaminany, dia mivarilavo ny vahoaka; fa sambatra kosa izany vahoaka izany raha mitandrina ny lalànan’ny Tompo.

¹⁹Tsy amin’ny teny no amaizana ny mpanompo; fa na azony aza izany, dia tsy hankatoaviny.

²⁰Raha mahita olona miteny tsy amim-piheverana ianao, dia ny adala no misy hantenaina kokoa noho izy.

²¹Izay mampihanta ny mpanompony hatry ny fahakely dia hampahaditra azy amin’ny farany.

²²Ny olona mora tezitra manetsika ady; izay mora misafoaka mampiavosa hadisoana.

²³Ny avonavon’ny olona no hampietry azy; fa ny manetry tena no hahazo haja.

²⁴Izay miray tetika amin’ny mpangalatra, dia fahavalon’ny tenany; nandre ny ozona mety hihatra izy, kanefa tsy milaza ny mpangalatra[80].

²⁵Mampidi-doza ny fahatahorana olona; fa izay matoky ny TOMPO kosa no voaaro.

²⁶Maro no mila sitraka amin’ny mpitondra; fa ny TOMPO ihany no mitsara ny olona tsirairay.

²⁷Halan’ny olo-marina ny olona mpivadi-bolana; ary halan’ny olon-dratsy ny mahitsy fitondrantena.