Read DIEM PROTESTANTA Ohabolana 30 Bible Online

Ohabolana 30 - DIEM PROTESTANTA bible

Ohabolana 30

¹Teny manan-danja nataon’i Agora zanakalahin’i Jake. Izao no teny hentitra nambaran’izany lehilahy izany tamin’i Itiela, dia tamin’i Itiela sy i Okala[81]:

²Eny, dondrona toa biby aho raha samy olona, fa tsy mba manana izay fahaizan’olombelona akory.

³Tsy nianatra fahendrena na oviana na oviana aho, saingy nahazo ny fahalalan’ireo olo-masina.

⁴Iza no efa niakatra tany an-danitra ka nidina avy tany indray? Iza no nahangona ny rivotra tao an-tanany? Iza no nahafono ny rano tamin’ny lambany? Iza no nandraikitra ny faravazan-tany rehetra? Iza no anarany? Iza no anaran-janany? Ambarao raha fantatrao.

⁵Voazaha toetra avokoa ny tenin’Andriamanitra. Toy ny ampinga Izy ho an’izay mialoka aminy.

⁶Aza manampy na inona na inona amin’ny teniny, fandrao hofaizin’Andriamanitra ianao ka hiharihary ny maha mpandainga anao.

⁷«Zavatra roa no angatahiko aminao, Andriamanitra ô, ka aza lavina alohan’ny hahafatesako.

⁸Alao amiko ny fitaka sy ny lainga ary aza omena fahantrana aho na koa harena, fa izay hanina sahaza ahy ihany omena ahy.

⁹Fandrao ho tototra harena aho, dia handà Anao ka hahateny hoe: ‹Fa iza moa ny TOMPO?› na fandrao hahantra aho, dia mety hangalatra ka hanala baràka ny anaran’Andriamanitro».

¹⁰Aza manendrikendrika ny mpanompo amin’ny tompony, fandrao hozoniny ianao ka hiharam-pahavoazana.

¹¹Misy karazan’olona izay manozona ny rainy ary tsy mba mirary soa ho an-dreniny.

¹²Misy karazan’olona izay mihevi-tena ho madio, nefa tsy voasasa ho afaka amin’ny fahalotoany.

¹³Misy karazan’olona izay fatra-pianjonanjona sady manana fijery miandranandrana.

¹⁴Misy karazan’olona izay manana toetra lozabe fa toy ny sabatra ny nifiny ary toy ny antsy ny vazany[82]. ka vonona izy hamongotra ny ory tsy ho amin’ny tany ary koa ny mahantra tsy ho eo anivon’ny olona.

¹⁵Manan-janakavavy roa ny dinta izay samy manao hoe: «Omeo! Omeo!» Misy zavatra telo tsy mety afa-po sady tsy mba manao hoe: «Aoka izay!» dia ny fonenan’ny maty, sy ny kibo tsy niteraka, ary ny tany tsy vonton-drano; kanefa misy koa zavatra fahefatra, dia ny afo izay tsy mba manao hoe: «Aoka izay!».

¹⁷Ny olona izay miandranandrana amin-dray sy mamingavinga ny fahanteran-dreny dia hopotsirin’ny goaikan-driaka ny masony ary hohanin’ny voromahery ny tenany.

¹⁸Misy zavatra telo tsy fantatro sady tsy takatro, dia ny fanidin’ny voromahery eny ana habakabaka sy ny fandadin’ny bibilava eny amin’ny vatolampy ary ny fizotran’ny sambo eny afovoan-dranomasina; kanefa misy koa zavatra fahefatra, dia ny firaikan’ny tovolahy amin’ny tovovavy.

²⁰Toy izao no fomban’ny vehivavy mpanitsakitsa-bady: misesika remby izy, dia mamafa vava ary miteny hoe: «Tsy nanao ratsy aho!»

²¹Misy zavatra telo mampikorontana tany, sady tsy azony leferina, dia ny andevo izay tonga mpanjaka sy ny adala izay miletra hanina ary ny vehivavy fanganga izay manambady; kanefa misy koa zavatra fahefatra, dia ny mpanompovavy mandimby tompovavy.

²⁴Misy karazam-biby efatra tena bitika etỳ ambonin’ny tany saingy manam-pahendrena mampitolagaga:

²⁵dia ny vitsika, izay andiam-biby tsy matanjaka, nefa manangona ny haniny amin’ny fahavaratra;

²⁶ny marmôta, izay andiam-biby tsy manan-kery, nefa mahavita trano eny amin’ny harambato;

²⁷ny valala, izay tsy mana-mpanjaka, nefa hain’izy rehetra ny miainga manao andiany;

²⁸ny androngo, izay azo samborin-tanana, nefa tonga hatrany an-dapan’ny mpanjaka.

²⁹Misy zava-miaina telo izay tsara famindra sy miedinedim-pandeha: dia ny liona, izay mahery indrindra amin’ny biby ka tsy mihemotra na amin’inona na amin’inona; sy ny soavaly izay manana andila-mihantsika, ary ny osilahy; kanefa misy koa fahefatra, dia ny mpanjaka eo alohan-tafika.

³²Raha niadaladala ka nanandra-tena ianao ary raha mba nieritreritra kosa avy eo, dia tampeno ny vavanao mba tsy hiteny!

³³Fa fikapohan-dronono no manome dibera, famelezana ny orona no mampivoa-dra, ary fanetseham-pahatezerana no miteraka ady.