Read DIEM PROTESTANTA Ohabolana 8 Bible Online

Ohabolana 8 - DIEM PROTESTANTA bible

Ohabolana 8

¹Injany fa miantso ny Fahendrena[24] ary manandra-peo ny fahaiza-manavaka.

²Eo an-tampon-kavoana amoron-dalana sady eo am-pihaonan-tsakelidalana no ijoroany.

³Eo anilan’ny vavahady fidirana ny tanàna sy toeram-pandalovan’olona no iantsoantsoany hoe:

⁴«Ianareo anie, rey olona, no antsoiko; ianareo rehetra no iantefan’ny teniko.

⁵Ry kely saina, fantaro ny fahendrena, ry adala, hamafiso ny fahalalana.

⁶Henoy fa zava-dehibe no holazaiko ka hiteny tsy misorona aminareo aho.

⁷Eny, ny marina ihany no lazain’ny vavako fa halan’ny molotro ny faharatsiana.

⁸Rariny avokoa izay tenin’ny vavako, fa tsy misy lainga na fitaka.

⁹Mazava avokoa izy ho an’ny mahira-tsaina ary mahitsy ho an’ny manam-pahalalana.

¹⁰Ny fampianarako no raiso fa tsy ny volafotsy ary aleo fahalalana toy izay ny volamena voafantina.

¹¹Satria Izaho Fahendrena dia tsara noho ny perla; tsy misy zava-tsarobidy azo ampitahaina amiko[25].»

¹²«Izaho Fahendrena no manana ny fahamalinana ka nahazo ny fahaiza-manao drafitrasa.

¹³Ny fankahalana ny ratsy no fanajana ny TOMPO. Samy halako na ny fiavonavonana na ny fireharehana na ny fitondrantena ratsy na ny vava fandainga.

¹⁴Ahy ny fahaiza-mamolavola sy mampihatra; Ahy koa ny fahaiza-manavaka sy ny hery manatanteraka.

¹⁵amin’ny alalako no anjakan’ny mpanjaka, sy ahazoan’ny mpitondra manao didy ara-drariny;

¹⁶amin’ny alalako no ifehezan’ireo mpifehy sy anaovan’ireo loholona fitsarana ara-drariny.

¹⁷Izaho dia tia izay tia ahy; ary izay mikatsaka ahy no hahita ahy.

¹⁸Miaraka amiko ny harena sy ny voninahitra, dia fananana mateza sy fanambinana sahaza.

¹⁹Izay omeko dia tsara noho ny volamena, eny, noho ny volamena madio indrindra; ary izay azo avy amiko dia tsara noho ny volafotsy voafantina.

²⁰Ny soritry ny fahamarinana no izorako dia ny lalana anjakan’ny rariny,

²¹mba hampahazoako zava-tsoa ireo tia ahy ka hamenoako ny tranon-drakiny.

²²«Nateraky ny TOMPO[26] ho voalohan’asany aho, dia talohan’ny asa nataony hatry ny elabe.

²³Natokany hatramin’ny fahagola aho, eny, natokany hatrany am-piandohana, dia fony tsy mbola nisy akory ny tany.

²⁴Fony tsy mbola ary ny rano lalimbe no efa teraka aho dia fony tsy mbola ary ny loharano miboiboika.

²⁵Talohan’ny niorenan’ny tendrombohitra sy talohan’ny havoana no efa teraka aho,

²⁶dia fony tsy mbola nataon’Andriamanitra na ny tany na ny saha midadasika eo aminy na ny vovotany singany voalohany teo amin’izao tontolo izao.

²⁷Efa teo aho, fony Andriamanitra namorona ny lanitra, sy namaritra ny faravodilanitra teo ambonin’ny rano lalimbe.

²⁸Nampivangongo ny rahona eny ambony Izy ary nampiboiboika ny loharano lalina;

²⁹nanisy faritra ho an’ny ranomasina Izy, dia faritra tsy azony hihoarana, ary nametraka ny fanorenan’ny tany.

³⁰Tamin’izany asa rehetra nataony izany dia nanampy azy toy ny mpanao mari-trano aho[27] ka sady antom-piravoravoany isan’andro isan’andro no nibita-kafaliana tsy tapaka teo anatrehany;

³¹nibita-kafaliana aho teo amin’ny tany noarîny ary naharavoravo ahy teo amin’ny olombelona.»

³²«Ary ankehitriny henoinareo aho, rey anaka; fa sambatra ianareo manaraka ny sori-dalako.

³³Henoy ny anatro ary aza lavina fa hampahendry anareo izany.

³⁴Sambatra izay olona mihaino ahy ka miandry isan’andro eo am-baravarako sy miambina eo an-tokonako!

³⁵Izay mahita ahy dia mahita ny fiainana sady mahazo sitraka amin’ny TOMPO.

³⁶Fa izay diso amiko dia handratra ny tenany, ary izay mankahala ahy dia tia fahafatesana.»