Read DIEM PROTESTANTA Kôheleta 10 Bible Online

Kôheleta 10 - DIEM PROTESTANTA bible

Kôheleta 10

¹Fatin-dalitra no mahamaimbo sy manimba ny ilomanitry ny mpanao zava-manitra; toy izany koa, ny fahadalana kely dia mavesa-danja bebe kokoa noho ny fahendrena.

²Ny fisainan’ny hendry dia miasa tsara, fa ny fisainan’ny adala kosa no diso fandray hevitra.

³Raha mandeha eny an-dalana ny adala, dia milaza tena amin’ny olon-drehetra ho adala satria tsy ampy saina izy.

⁴Raha tezitra aminao ny mpampiasa anao, dia aza miala amin’ny toeranao; fa ny fihetsika tony misoroka fahadisoana be vava.

⁵Mety diso ny mpitondra. Ratsy hitako tetỳ ambonin’ny tany koa izany.

⁶Misy indraindray olona adala mitana toerana ambony, ary misy olo-manankaja[30] voatazona amin’ny toerana ambany.

⁷Nahita mpanompo mitaingin-tsoavaly aho ary olona ambony mandeha tongotra toy ny mpanompo.

⁸Ny olona izay mihady lavaka no mety ho latsaka ao ary izay mandrava rindrina no ho voakaikitry ny bibilava[31].

⁹Izay manongotra ny vato no haratrany ary izay mamaky ny hazo no mety hahita loza.

¹⁰Raha dombo ny famaky ka tsy asaina, dia tsy maintsy mampiasa bebe kokoa ny herin-tena ny mpikapa. Ny fahendrena manko no fomba tsara indrindra hahombiazana.

¹¹Tsy misy tombontsoan’ny olona mahay mibaiko bibilava, raha toa ka mbola voakaikiny ihany.

¹²Ny teny aloaky ny vavan’ny hendry dia sitraky ny olona; fa ny resaky ny adala kosa manala baràka tena.

¹³Fahadalana no fiandohan’ny teny aloaky ny vavany; fa ny fiafarany kosa dia fahaverezan-tsaina mampidi-doza.

¹⁴Tsy mitsaha-miteny ny adala; kanefa tsy misy olona mahalala akory ny hoavy. Tsy misy mahalaza amin’ny olona izay hitranga aorian’ny fahalasanany?

¹⁵Reraka mafy amin-javatra bitika ny adala, fa ny lalana mankao an-tanàna avy no tsy fantany.

¹⁶Mampalahelo ny tany izay manana mpanjaka mbola tanora fanahy sy mpitondra tendan-kanina vao maraina.

¹⁷Sambatra kosa ny tany izay manana mpanjaka ombàn-toe-panahy ambony sy mpitondra misakafo ara-potoana mba ho fanovozan-kery fa tsy ho fimamoana.

¹⁸Mampiletsy ny tafontrano ny fahakamoana hanamboatra azy; ary ny asa tsirambina no mampitete ny trano.

¹⁹Manao sakafo ireo lehibe mba hikoranany; ny divay kosa maharavoravo ny ainy; ary ny vola no hahazoany manao izany rehetra izany.

²⁰Aza manozona ny mpanjaka, na dia anakampo ihany aza; tahaka izany koa aza manozona ny olo-manankaja na dia ao an’efitrano fandrianao aza. Fa mety hoentin’ny vorona ny feonao ary hambaran’ny manana elatra ny teninao.