Read DIEM PROTESTANTA Tononkiran'i Salômôna 1 Bible Online

Tononkiran'i Salômôna 1 - DIEM PROTESTANTA bible

Tononkiran'i Salômôna 1

¹Ny tononkira tsara indrindra amin’ny tononkira rehetra. Ao amin’ny rakitsoratr’i Salômôna[2].

²Hanoroka mafy ahy tokoa anie ianao! Fa ny safosafonao dia fy mihoatra noho ny divay

³ary koa mamerovero mihoatra noho ireo ilomanitrao. Ianao dia mahasintona mihoatra noho ny ilomanitra voafantina; koa izany no itiavan’ireo zatovovavy anao.

⁴Ento aho hanaraka anao, ary aoka isika hihazakazaka. Dia ianao mpanjakako[3] no hampiditra ahy an’efitranonao. Aoka isika, noho ny aminao, hiara-tsambatra sy hiara-paly; dia hankamamiantsika anie ny safosafonao izay fy mihoatra noho ny divay. Marina ny itiavan’ireo zatovovavy anao!

⁵Ry tovovavin’i Jerosalema ô, zarazara hoditra aho nefa bikana; ny tarehiko dia mivalomainty toy ny lain’ireo mpifindrafindra lasy, nefa meva toy ny temitr’i Salômôna.

⁶Aoka re aho mba tsy hojerenareo araka ny mahazarazara hoditra ahy, satria nodanihin’ny hainandro aho! Tezitra tamiko ireo anadahiko ka nanery ahy hiambina ny tanimboalobony; nefa ny tanimboaloboko, dia ny an’ny tenako manokana, tsy mba nambenako akory!

⁷Ambarao ahy, ry ilay tiako, izay iandrasanao ny ondrinao sy izay ampialanao sasatra azy rehefa mitataovovonana mba tsy hivezivezeko[4] hitady anao eny amin’ny andiam-bibin’ireo namanao.

⁸Raha tsy fantatrao izany, ry vehivavy tsara tarehy indrindra, dia araho ny dian’ondry; ka tariho ny zanak’osinao hanakaiky ny lain’ireo mpiandry ondry.

⁹Amiko ianao, rahavako, dia meva tahaka ny soavaly mpanao matso izay mitarika ny kalesin’ny Farao.

¹⁰Mahatsara ny takolakao ireo kavina eo an-daniny avy; ary manendrika ny tenanao ny rado iambozonanao.

¹¹Rojo volamena voaravaka volafotsy no hampanaovinay ho anao.

¹²Fony mbola eo amin’ny fanasàny no mipetraka ity mpanjakako, dia mamerovero aoka izany ny ilomanitro natao tamin’ny narda.

¹³Ny malalako amiko dia mamerovero tahaka ny miora iray fonosana izay mialina eo an-tratrako;

¹⁴ny malalako amiko dia manimanitra tahaka ny voninkazo dia mamelana any an-tanimboalobok’i Haîna-Gedỳ[5].

¹⁵Tsara tarehy ianao, rahavako, eny, tsara tarehy ianao; ny masonao dia mahafinaritra tahaka ny voromahailala.

¹⁶Tsara tarehy koa ianao, ry malalako, sady mambabo tokoa. Ahi-maitso mavana no fandriantsika;

¹⁷rantsana sedera no miendrika sakamandimby amin’ny tranontsika, ary hazo kipresy no toa peta-drindrina.