Read DIEM PROTESTANTA Tononkiran'i Salômôna 3 Bible Online

Tononkiran'i Salômôna 3 - DIEM PROTESTANTA bible

Tononkiran'i Salômôna 3

¹Isan’alina aho eo am-pandriako iny dia mitady ilay tiako; tadiaviko izy fa tsy hitako.

²Hifoha aho ka hitety ny tanàna, hamakivaky arabe sy kianja, mba hitady ilay tiako; tadiaviko izy fa tsy hitako.

³Ireo mpiambina misafo ny tanàna no tojo ahy ka anontaniako hoe: «Mba hitanareo ve ilay tiako izay?»

⁴Vao nolalovako kely ireo, dia hitako ilay tiako; ka hazoniko izy fa tsy avelako, raha tsy tongako any an-trano ao an’efitr’ilay reny niteraka ahy.

⁵«Ry tovovavin’i Jerosalema ô, noho ny amin’ny gazela na ny dieravavy eny an-tsaha, dia miangavy mafy anareo aho hoe: Aza tairina na fohazina ilay tiako, raha tsy efa sitrapony[11]!»

⁶Iza moa irỳ miakatra avy any an-taniefitra[12] tahaka ny setroka mitambolimbolina ho etona mandraradraraka miora sy emboka mamerovero ary fofon-javamanitra isan-karazany?

⁷— I Salômôna eo amin’ny filanjàny iny, otronin’ny miaramila enimpolo, dia miaramila voafantina tamin’i Israely.

⁸Mirongo sabatra avokoa ireo sady efa voasedra hiady. Misakelika ny sabany avy izy hiatrehana fanairana amin’ny alina.

⁹Nampanao filanjana ho azy tamin’ny hazo avy any Libano i Salômôna mpanjaka.

¹⁰Volafotsy no natao tanjany, volamena ny fiankinana, lamba volomparasy ny fipetrahana; ary ny ao anatin’io filanjana io dia ireo tovovavin’i Jerosalema no nandravaka azy tamim-pitiavana.

¹¹«Ry tovovavin’i Jerosalema ô, andao hijery an’i Salômôna mpanjaka manao ilay satroboninahitra izay nasatroky ny reniny azy tamin’ny androm-panambadiany, dia ilay andro nifalian’ny fony.»