Read DIEM PROTESTANTA Tononkiran'i Salômôna 7 Bible Online

Tononkiran'i Salômôna 7 - DIEM PROTESTANTA bible

Tononkiran'i Salômôna 7

¹— Miverena, miverena, ry Solemita; miverena, miverena hijerenay anao. — Nahoana ianareo no mijery ilay Solemita, toy ny mijery ny dihin’ny roa tonta[27]?

²Endrey, ry ilay zanakavavin’olom-banona, ny hatsaran’ny tongotrao mikapa! Ny amboampenao dia toa fehivozona izay sangan’asan’ny mpahay taozavatra.

³Ny foitranao dia miendrika kaopy boribory[28]; tsy ho diso divay nolaroin-java-manitra anie izany. Ny kibonao dia toa antontam-barimbazaha izay voaravaka lisy manodidina.

⁴Ny nononao roa dia hoatra zana-gazela, dia gazela kambana mbola tanora.

⁵Ny vozonao dia toa tilikambo ivoary. Ny masonao dia manahaka ireo kamory any Hesbôna, eo am-bavahadin’i Baty-Rabima[29]. Ny oronao dia maranidranitra tahaka ilay Tilikambon’i Libano izay mpiambina tandrifin’i Damasy.

⁶Eo ambonin’ny tenabenao, ny lohanao dia meva fisandratra tahaka ny tendrombohitra Karmela; ny volon-dohanao dia sady mivolomparasy no olioly mambabo ny mpanjaka.

⁷Tsara tarehy sady mahafinaritra tokoa ianao, ry tiako sy vehivavy loharanon-kasambarako.

⁸Izato tsangananao dia matsoraka tahaka ny hazo palma; ary ireo nononao dia toa sampahom-boaloboka.

⁹Izany no mampiteny ahy hoe: «Hianika ny hazo palma aho ka handray ny rantsany.» Enga anie ireo nononao ho toa sampahom-boaloboka ho ahy; enga anie ny hanitry ny fofonainao hamerovero tahaka ny paoma,

¹⁰ary ny vavanao hankafiziko tahaka ny divay tsara...! ...eny, divay tsara voatokana ho an’ny malalako ary hisoko amin’ny molotray rehefa matory.

¹¹An’ny malalako aho ary ho amiko ny faniriany.

¹²Avia, ry malalako, ndeha isika ho any an-tsaha ka hialina eny anivon’ny voninkazo dia[30].

¹³Hankany an-tanimboaloboka isika, dieny vao maraina ny andro, hijery raha mitsimoka ny voaloboka na efa mivelatra ny voniny, ary mamelana ny ampongabendanitra. Any no hanomezako safosafo anao.

¹⁴Mihanaka ny hanitry ny paomam-pitiavana[31]. Ary eo am-baravarantsika avokoa ireo voankazo matsiro, na ny vao na ny ela; samy atokako ho anao ireny, ry malalako.