Read DIEM PROTESTANTA Isaià 18 Bible Online

Isaià 18 - DIEM PROTESTANTA bible

Isaià 18

¹Lozanao, ry tany misy ireo lakana manana elatra izay manara-morona ny onin’i Etiôpia[105]!

²Irahinao ny masoivoho izay mandeha lakan-jozoro eny ambonin’ny ranon’i Neily. — Miverena ianareo, ry iraka faingam-pandeha, any amin’ireo olona ranjanana sy malandilandy, any amin’ilay firenena atahorana hatreto ka hatrany am-paran’ny tany, any amin’ilay firenena matanjaka izay manosihosy ny fahavalony. Miverena any amin’ny taninareo izay vakivakîn’ny ony maro.

³Ianareo rehetra mponina amin’izao tontolo izao ka mipetraka eto ambonin’ny tany, mijere rehefa atsangana eny an-tendrombohitra ny faneva famantarana, mihainoa raha vao maneno ny anjomara.

⁴Fa izao no nolazain’ny TOMPO tamiko: «Avy etỳ amin’ny fonenako ambony etỳ no andinihako izay miseho, ka tsy mihontsona mihitsy Aho toy ny hafanana migaingaina apariakan’ny masoandro sy toy ny raho-manify[106] amin’ny fotoam-pijinjana.»

⁵Fa alohan’ny fotoam-pijinjana, rehefa tapitra namelana avokoa ny voaloboka ary rehefa tonga voany mihamasaka ny voniny, dia horantsanana amin’ny hety ny rantsany, ary hotapahina ny sakeliny sy ny raviny.

⁶Izany rehetra izany dia hilaozana ho an’ny vorona mpihaza eny an-tendrombohitra sy ny bibidia eny ambonin’ny tany[107]; ao no handany fahavaratra ny vorona mpihaza ary handany ririnina ny bibidia rehetra.

⁷Amin’izany fotoana izany dia hanolotra fanomezana ho an’ny TOMPOn’izao rehetra izao ireo olona ranjanana sy malandilandy, dia ilay firenena atahorana hatreto ka hatrany am-paran’ny tany, ilay firenena matanjaka izay manosihosy ny fahavalony sady vakivakîn’ny ony maro ny taniny. Any an-tendrombohitra Tsiôna izay hitoeran’ny TOMPOn’izao rehetra izao no hanolorany izany fanomezana izany.