Read DIEM PROTESTANTA Isaià 22 Bible Online

Isaià 22 - DIEM PROTESTANTA bible

Isaià 22

¹Hafatra momba ny lohasahan’ny fahitana[123]. Fa inona ity mahazo anareo no miakatra eny an-tampon-trano, ry mponin’i Jerosalema?

²Nahoana no maresaka be ny tanàna ary feno antsoantso sy tabataba? Tsy matin-tsabatra anefa ireo maty eo aminao ary tsy maty novonoina tamin’ny ady.

³Nitsoaka nandositra ireo mpitari-tafikao, azo babo noho ny tifitra tsipîka izy. Nataon’ny fahavalo sambo-belona avokoa izay hitany, hatramin’ireo efa nitsoaka nandositra lavitra aza.

⁴Izany no itenenako aminareo hoe: «Aza mijery ahy intsony fa aleo aho hitomany mafy. Aza misahirana mampionona ahy akory noho ny fandringanana nanjo ny fireneko.

⁵Satria amin’ity andro anio ity ny Tompo ANDRIAMANITR’izao rehetra izao no mandefa fisavoritahana sy faharesena ary fahaverezan-kevitra ho antsika.» Rava ny manda eo amin’ny lohasahan’ny fahitana ary manako hatrany an-tendrombohitra ny antso vonjy!

⁶Mitondra tsipîka sy zana-tsipîka ny Helamita, sady mitaingina kalesy sy soavaly; ary mamelatra ampinga ny mpiady avy any Kira[124].

⁷Feno kalesy sy soavaly, ry Jerosalema, ny lohasahanao tsara indrindra; milahatra eo am-bavahadinao ireny,

⁸ka tsy misy fiarovana ho an’i Joda intsony. Tamin’izany andro izany, dia nojerenareo ny fitaovam-piadiana napetraka hitoby tao amin’ilay trano antsoina hoe «Lapan’ny Ala[125]»,

⁹ary hitanareo ny banga maro amin’ny mandan’ny tanànan’i Davida. Tao amin’ny fitobian-drano ambany[126] no namorianareo rano.

¹⁰Nisainareo ny trano tao Jerosalema ka noravanareo ny sasany mba hahamora ny hiarovana ny manda.

¹¹Nanamboatra dobon-drano teo anelanelan’ny manda roa[127] ianareo mba halehan’ny rano mihoatra avy amin’ny fitobian-drano taloha. Nefa tsy mba nojerenareo akory Ilay nanao izao toe-javatra izao; efa nanomana izao hatry ny ela Izy saingy tsy hitanareo.

¹²Tamin’izany andro izany dia niantso anareo ny Tompo ANDRIAMANITR’izao rehetra izao mba hitomany sy hitoloko, hanaratra volon-doha sy hitondra lamba fisaonana.

¹³Kanjo fifaliam-be no nataonareo: novonoina ny omby sy ny ondry ka fihinanan-kena sy fisotroan-divay moa izao! «Andeha isika hihinana sy hisotro fa rahampitso dia ho faty[128], hoy ianareo.»

¹⁴Koa ny TOMPOn’izao rehetra izao dia mampandre ahy ny hafatra hoe: «Mianiana Aho fa mandra-pahafatinareo dia tsy havelako mihitsy izany helokareo izany. Izaho Tompo ANDRIAMANITR’izao rehetra izao no efa niteny.»

¹⁵Izao no voalazan’ny Tompo ANDRIAMANITR’izao rehetra izao: «Ndeha mankany amin’i Sebnà, mpanolotsain’ny mpanjaka sady lehiben’ny lapa ka mitenena aminy hoe:

¹⁶— Inona no anao atỳ ary inonao no atỳ, no mampandoaka ny fasana hilevenanao etỳ amin’ny havoana etỳ ianao ary mandavaka ny fonenanao rahatrizay etỳ amin’ny harambato etỳ?

¹⁷Indro ny TOMPO hamely anao indray mipaoka monja, rangahy, dia hataony an-kitapo ianao

¹⁸sy hahorony toy ny bolabolan-javatra ka hakodiadiany ho any amin’ny tany anankiray izay misy faritra malalaka. Any no hahafaty ny tenanao mbamin’ny kalesim-boninahitrao, ry ilay manala baràka ny ao an-tranon’ny tomponao.

¹⁹Horoahiko hiala amin’ny toeranao ianao ary hoesoriko amin’ny andraikitrao.

²⁰Amin’izany andro izany, dia hantsoiko i Eliakima, zanakalahin’i Hilkià mpanompoko,

²¹ka hampitafiako ny akanjonao, sy hampietràko ny fehikibonao ary hotolorako ny fahefànao. Ho an’ny mponin’i Jerosalema sy ny fanjakan’i Joda dia hanjary ray i Eliakima.

²²Hapetrako eo an-tsorony ny fanalahidin’ny lapan’i Davida; ka raha hamoha varavarana izy dia tsy hisy hanidy, ary raha hanidy izy dia tsy hisy hamoha[129].

²³Halentiko toy ny tsatòka eo amin’ny toerana mafy izy, ka ho tonga anaram-boninahitra ho an’ny fianakavian-drainy.»

²⁴Kanefa hihantona hitambesatra eo amin’i Eliakima avokoa ny sampan’ny fianakavian-drainy na ny lehibe na ny kely, ka tahaka ny fanaka madinika isan-karazany, hatramin’ny lovia ka hatramin’ny siny, mihantona amina tsatòka anankiray.

²⁵«Amin’izany andro izany, hoy ny teny hentitry ny TOMPOn’izao rehetra izao, dia hiletsy ilay tsatòka natsatoka teo amin’ny toerana mafy; hiala izy ka hianjera, ary ho vaky avokoa ireo entana rehetra nahantona teo.» Izany no nambaran’ny TOMPO.