Read DIEM PROTESTANTA Isaià 35 Bible Online

Isaià 35 - DIEM PROTESTANTA bible

Isaià 35

¹Aoka hiravoravo ny taniefitra sy ny tany karankaina! Aoka hifaly ny tany ngazana ka hamony voninkazo meva toy ny lisy.

²Aoka ho rakotra voninkazo izy ka hitotorebika sy handihy ary hihorakora-pifaliana! Satria nomen’ny TOMPO azy ny voninahitr’i Libano mbamin’ny famirapiratan’ny tendrombohitra Karmela sy ny famirapiratan’ny lemak’i Sarôna[179]. Amin’izay no hahitana ny voninahitry ny TOMPO sy ny famirapiratan’ilay Andriamanitsika.

³Ampaherezo ny tanana miraviravy ary hatanjaho ny lohalika malemy[180].

⁴Lazao amin’izay kivy hoe: «Mahereza, aza matahotra; indro ny Andriamanitrareo tonga hitondra famaizana ka hanasazy ny fahavalonareo; Izy mihitsy no tonga hamonjy anareo.»

⁵Dia hahiratra ny mason’ny jamba ary handre ny sofin’ny marenina.

⁶Hitsambikina toy ny diera ny mandringa, hiteny an-kafaliana ny lelan’ny moana[181], satria hiboiboika any an-taniefitra ny rano ary hisy ranon-driaka any amin’ny tany ngazana.

⁷Ny tany karakaina hanjary farihy, ny tany mangentana hiboiboika loharano. Ary eo amin’ny toerana famitsahan’ny amboadia dia hanirian’ny volotara sy ny zozoro.

⁸Any no hisy arabe voamboatra hantsoina hoe «lalana voatokana». Tsy hahazo handalo eo izay maloto ary tsy hitonantonana eo ny mpanompo sampy; fa ny Tompo dia hisava izany lalana izany, ho an’ny vahoakany ihany.

⁹Tsy hahitana liona io lalana io sady tsy hiakaran’ny biby masiaka; tsy hisy ho hita eo ireny fa izay nafahan’ny Tompo no handeha eo.

¹⁰Izany no lalana hiverenan’ireo navotan’ny TOMPO, ka hahatongavany ao Tsiôna amin’ny fihobiana; haravoana mandrakizay no ho eny amin’ny endriny, hafaliana sy haravoana no hanenika azy fa handositra kosa ny alahelo aman-tsento.