Read DIEM PROTESTANTA Isaià 43 Bible Online

Isaià 43 - DIEM PROTESTANTA bible

Isaià 43

¹Ankehitriny kosa izao no lazain’ny TOMPO Izay nahary anao, ry firenen’i Jakôba sy namorona anao, ry vahoaka Israely: «Aza matahotra ianao, fa efa navotako; ny anaranao no efa niantsoako anao, ka Ahy ianao.

²Raha mamakivaky ny rano ianao, dia homba anao Aho; raha miampita ny ony ianao, dia tsy hanafotra anao ireny; raha mandeha eo anivon’ny afo ianao, dia tsy ho may akory fa tsy handoro anao ny lelafo.

³Satria Izaho no TOMPO Andriamanitrao, ilay Masin’i Israely mpamonjy anao. Nomeko hanavotana anao i Ejipta; ary nataoko solonao i Etiôpia sy i Sebà.

⁴Satria sarobidy eo imasoko ianao, manan-danja amiko sady tiako. Koa nanome olona ho solonao Aho sy firenena maro ho takalon’ny ainao.

⁵Aza matahotra fa momba anao Aho. Avy any atsinanana no hamerenako ny taranakao, avy any andrefana no hanangonako ireo olonao.

⁶Hoy Aho amin’ny avaratra: ‹Omeo Ahy ireo›, ary amin’ny atsimo: ‹Aza hazonina izy!› Avereno amiko ny zanako lahy avy any lavitra sy ny zanako vavy avy any am-paran’ny tany,

⁷dia izay rehetra mitondra ny anarako sady noarîko sy novolavolaiko mba hanome voninahitra Ahy.

⁸Avoahy ny olona mana-maso nefa jamba, ary manan-tsofina nefa marenina.

⁹Aoka hiangona ny firenena rehetra ary hivory ny olombelona! Iza amin’ireo andriamanitrareo no mahalaza aminay ny zava-nitranga? Aoka izy hanambara aminay ny zava-niseho voalohany[221]. Aoka hasehony ny vavolombelony mba haneho ny fahamarinany; ary aoka ny vavolombelony hihaino azy ka hanamafy hoe: «Marina izany!»

¹⁰Hoy ny teny hentitry ny TOMPO hoe: Ianareo vahoakako no vavolombeloko, ianareo no mpanompoko izay nofidiko mba hahafantaranareo sy hitokianareo Ahy ary hahatakaranareo ny maha Izaho Ahy; talohako dia tsy nisy Andriamanitra ary tsy hisy handimby Ahy aoriako.

¹¹Izaho dia Izaho ihany no TOMPO, ka tsy misy mpamonjy afa-tsy Izaho.

¹²Izaho no nanambara sy nanome ny famonjena ka nampahafantatra izany rahateo, fa tsy nisy andriamani-kafa tao aminareo. Koa ianareo no vavolombeloko, hoy ny teny hentitra avy amiko TOMPO; ary Izaho no Andriamanitra.

¹³Eny, hatrizay hatrizay dia izany no maha Izaho Ahy. Tsy misy maharombaka izay eo an-tanako, ary tsy misy mahaova izay ataoko.

¹⁴Izao no lazain’ny TOMPO mpanavotra anareo, dia ilay Masin’i Israely: «Noho ny fitiavako anareo dia haniraka olona hankany Babilôna Aho, mba hamaha ny hidy rehetra.

¹⁵Izaho no TOMPO, ilay Masinareo, Mpahary an’i Israely sady mpanjakanareo.»

¹⁶Izao no lazain’ny TOMPO, ilay nanokatra lalana tany an-dranomasina sy nitari-dalana teo anivon’ny rano manonja,

¹⁷Ilay nampamoaka ny kalesy sy ny soavaly ary ny miaramila sy ny andian-tafika mahery, dia indray lavo ireo ka tsy tafarina intsony, sempotra ka maty toy ny lahin-jiro milofika; eny, izao no lazain’ny TOMPO ankehitriny:

¹⁸«Aza tsaroanareo intsony ny zava-niseho voalohany[222], aza itodihana intsony ny lasa.

¹⁹Fa hanao zavatra vaovao Aho; ary ankehitriny efa mipoitra sahady izany, ka ho hainareo fantarina tokoa. Eny, hisava lalana any an-taniefitra Aho sady hampandriaka ony an-tany karakaina.

²⁰Dia hanome voninahitra Ahy ny bibidia mbamin’ny amboahaolo sy ny vorombe, satria manisy rano any an-taniefitra Aho sy nampandriaka ony an-tany karakaina mba hampisotroako ny vahoaka nofidiko,

²¹dia ilay vahoaka noforoniko ho Ahy ka hitantara ny antony hiderany Ahy.»

²²Dia izao koa no lazain’ny Tompo: «Tsy Izaho no nantsoinao, ry firenen’i Jakôba, ary efa sasatra tamiko aza ianao, ry vahoaka Israely.

²³Tsy ho Ahy no nitondranao zanak’ondry hatao sorona dorana manontolo, ary tsy ho fanomezam-boninahitra Ahy ny soronao. Tsy nampanompo anao tamin’ny fitakiana fanatitra Aho na nanasatra anao tamin’ny fitakiana vovo-javamanitra.

²⁴Tsy ho Ahy no namoizanao volafotsy mba hividianana veromanitra; ary tsy Izaho no novokisanao tamin’ny jaboran’ny soronao. Fa ianao no nampanompo Ahy tamin’ny fahotanao sy nanasatra Ahy tamin’ny helokao.

²⁵Kanefa Izaho dia Izaho mihitsy no mamela ny fahadisoanao noho ny amin’ny tenako ihany, ka tsy hotsarovako intsony ny fahotanao.

²⁶Ampahatsiarovy Ahy hoe ny fanakiananao Ahy, dia avia hifandahatra momba izany isika; ka ianao no aoka hanao famisavisana mba hahitana ny mahamarina anao!

²⁷Ilay razanao voalohany efa nanota, ary ireo mpitondrateninao efa nikomy tamiko[223].

²⁸Koa dia nataoko afa-baràka ireo mpiandraikitra ny Toeramasina, natolotro haringana ny firenen’i Jakôba ary navelako holatsaina ny vahoaka Israely.