Read DIEM PROTESTANTA Levitîka 18 Bible Online

Levitîka 18 - DIEM PROTESTANTA bible

Levitîka 18

¹Dia niteny tamin’i Mosesy ny TOMPO

²mba hamepetra ny Israelita hoe: «Izaho no TOMPO Andriamanitrareo!

³Aza manao araka ny fanaon’i Ejipta izay tany nonenanareo; aza manao araka ny fanaon’i Kanahàna izay tany efa hampidirako anareo[67]; ary aza manaraka ny lalànan’ireny firenena ireny ianareo.

⁴Ny fitsipiko no tanteraho, ary ny lalànako no imasoy harahina. Izaho no TOMPO Andriamanitrareo.

⁵«Tandremo ny lalàna amam-pitsipiko; fa izay manatanteraka izany, dia ho velona amin’izany[68]. Izaho no TOMPO.

⁶«Aoka tsy hisy lehilahy israelita hila vehivavy havany akaiky dia akaiky mba hiray aminy. Izaho no TOMPO.

⁷«Aza miray amin’ny reninao ianao, fa manala baràka ny rainao izany; reninao izy ka aza ifoteranao.

⁸«Aza miray amin’ny renikelinao[69] fa manala baràka ny rainao izany.

⁹«Aza miray amin’ny anabavinao zanakavavy nentin-drainao na nentin-dreninao, ka nobeazina tao an-trano fonenana na tany an-kafa[70].

¹⁰«Aza miray amin’ny zafinao vavy, nateraky ny zanakalahinao na ny zanakavavinao, fa manala baràka anao izany.

¹¹«Aza miray amin’ny zanakavavin’ny renikelinao, satria anabavinao izy noho ny rainao manjary rainy[71].

¹²«Aza miray amin’ny anabavin-drainao, satria havan-drainao akaiky dia akaiky izy.

¹³«Aza miray amin’ny rahavavin-dreninao, satria havan-dreninao akaiky dia akaiky izy.

¹⁴«Aza alaim-baràka ny rahalahin-drainao noho ny firaisanao amin’ny vadiny, izay nenitoanao[72].

¹⁵«Aza miray amin’ny vinantovavinao, fa vadin’ny zanakalahinao izy[73].

¹⁶«Aza miray amin’ny vadin-drahalahinao, fa manala baràka ny rahalahinao izany[74].

¹⁷«Aza miray amin’ny vehivavy anankiray no sady hiray amin’ny zananivavy na koa hiray amin’ny zafikeliny vavy, nateraky ny zananilahy na zananivavy, satria mpihavana akaiky ilay vehivavy sy ny zanaka aman-jafiny ka firaisana mampifamotitra izany[75].

¹⁸«Aza mampakatra ny rahavavim-badinao raha mbola velona ilay vadinao, satria hampifandrafy azy mirahavavy izany.

¹⁹«Aza mila vehivavy mbola voaloton’ny fadimbolany mba hiray aminy[76].

²⁰«Aza miray amin’ny vadin’olona mpiray firenena aminao, satria ho voaloton’izany ianao[77].

²¹«Aza misy omena hatao sorona dorana hanajana ny sampy Môlôka ny zanakao[78], satria manala baràka ny anaran’Andriamanitrao izany. Izaho no TOMPO.

²²«Aza miray amin’ny lehilahy tahaka ny firay amin’ny vehivavy; zava-mamoafady izany[79].

²³«Aza miray amin’ny biby, satria ho voaloton’izany ianao; ary aoka tsy hisy vehivavy hety hiray amin’ny biby, fa zava-mamoafady indrindra izany[80].

²⁴«Aza misy andotoanareo tena ireo zavatra ireo; fa tamin’ireo no nandoto tena ny hafa firenena izay efa horoahiko eo anoloanareo.

²⁵Voaloto mbamin’ny tany aza, ka novaliako ny helony ary naloany ny mponina teo aminy.

²⁶«Noho izany, ianareo Israelita tompontany na vahiny valovotaka eo aminy, dia tandremo ny lalànako amam-pitsipiko, ka aza misy atao ireo zava-mamoafady ireo.

²⁷Fanaon’ny olona talohanareo tao amin’ny tany Kanahana ireo, ka dia naloto ny tany.

²⁸Aza lotoinareo indray ny tany mba tsy handoavany anareo tahaka ny efa nandoavany an’ireo firenena izay tao talohanareo.

²⁹Hofongorana tsy ho anisan’ny vahoaka israelita manko izay rehetra manao amin’ireo zava-mamoafady ireo.

³⁰«Koa tandremo izay asaiko tandremanareo mba tsy hisy hataonareo akory ny fomba mamoafady izay fanaon’ny olona talohan’ny fahatongavanareo; ka aza mandoto tena amin’izany ianareo. Izaho no TOMPO Andriamanitrareo.»