Read DIEM PROTESTANTA Levitîka 20 Bible Online

Levitîka 20 - DIEM PROTESTANTA bible

Levitîka 20

¹Dia niteny tamin’i Mosesy ny TOMPO nanao hoe:

²«Izao no lazao amin’ny Israelita. Na iza na iza, Israelita na vahiny valovotaka eo aminy, manolotra ny iray amin’ny zanany ho sorona amin’ny sampy Môlôka[101], dia hatao maty tokoa; ka torabato no hamonoan’ny mponina tompontany azy.

³Ary Izaho mihitsy no hanandrina izany olona izany ka hofongorako tsy ho anisan’ny vahoaka israelita izy satria natolony ho sorona tamin’i Môlôka ny iray amin’ny zanany; izany no andotoana ny Toeramasina onenako sy analam-baràka ny anarako masina.

⁴Raha mody tsy mahita izany olona izany ny mponina tompontany mba tsy hahafaty azy noho ny zanany natolony tamin’i Môlôka,

⁵dia Izaho mihitsy no hanandrina izany olona izany sy ny ankohonany ka hofongorako tsy ho anisan’ny vahoaka israelita izy mbamin’ireo nanaraka azy hanompo ny sampy Môlôka.

⁶«Raha misy olona mivily hanaraka izay mpamoha angatra sy izay tsindrian-javatra ka hanao fombafomba fanompoan-tsampy dia hohandriniko izy ka hofongorako tsy ho anisan’ny vahoaka israelita.

⁷Manokàna tena ho Ahy ianareo, ary aoka ho masina fa Izaho no TOMPO Andriamanitrareo.

⁸«Imasoy hotanterahinareo ny lalànako rehetra. Izaho no TOMPO Izay nanokana anareo mba ho vahoakako.

⁹«Na iza na iza manozona ny rainy na ny reniny, dia hatao maty tokoa; hozakain’io olona io ny ho faty, noho izy efa nanozona ny rainy na ny reniny[102].

¹⁰«Raha misy lehilahy maka ny vadin’ny mpiray firenena aminy, dia samy hatao maty tokoa na ralehilahy mpaka vadin’olona na ravehivavy nalainy[103].

¹¹«Ny lehilahy, izay miray amin’ny vadin-drainy, dia manala baràka ny rainy; ary samy hatao maty tokoa na io lehilahy io na ny vadin-drainy, ka hozakain’izy roroa ny ho faty[104].

¹²«Raha misy lehilahy miray amin’ny vinantovaviny, dia samy hatao maty tokoa izy roroa satria firaisana mifamotitra izany, ka hozakain’izy roroa ny ho faty[105].

¹³«Raha misy lehilahy miray amin’ny lehilahy hafa tahaka ny firay amin’ny vehivavy, dia manao zavatra mamoafady izy roa lahy; samy hatao maty tokoa izy, ka hozakainy ny ho faty[106].

¹⁴«Raha misy lehilahy manambady vehivavy mianaka, dia fanambadiana mampifamotitra izany; ka samy hodorana izy telo, mba hisakanana ny fisian’izany haratsiam-pitondrantena izany eo aminareo[107].

¹⁵«Raha misy lehilahy miray amin’ny biby, dia hatao maty tokoa izy ary hovonoinareo koa ilay biby.

¹⁶Raha misy vehivavy mety hiray amin’ny biby, dia samy hovonoina na ravehivavy na ilay biby; hatao maty tokoa izy roroa ka hozakainy ny ho faty[108].

¹⁷«Raha misy lehilahy manambady anabavy zanakavavy nentin-drainy na nentin-dreniny, ka miray tokoa izy roroa, dia zavatra mahamenatra izany; eo imason’ny mpiray firenena aminy no hofongorana tsy ho anisan’ny vahoaka israelita izy roroa, satria niray tamin’ny anabaviny ralehilahy ka itambesaran-keloka[109].

¹⁸«Raha misy lehilahy mandry sy miray amin’ny vehivavy mararin’ny fadimbolany, dia nifanaraka hampihanjahanja ny ipoiran’ny ran-dravehivavy izy roroa, ka samy hofongorana tsy ho anisan’ny vahoaka israelita[110].

¹⁹«Aza miray amin’ny rahavavin-dreninao na ny anabavin-drainao; satria raha misy lehilahy miray amin’ny havana akaiky dia akaiky toy izany, dia samy itambesaran-keloka izy roroa.

²⁰«Raha misy lehilahy miray amin’ny vadin’ny rahalahin-drainy, dia manala baràka ny rahalahin-drainy izy; samy hitambesaran-keloka izy roroa, ka ho faty momba[111].

²¹«Raha misy lehilahy maka ny vadin-drahalahiny, dia zavatra mamoafady izany; noho io lehilahy io nanala baràka ny rahalahiny, dia samy ho momba izy roroa[112].

²²«Imasoy hotanterahinareo ny lalàna amam-pitsipiko rehetra, dia tsy handoa anareo ny tany izay itondrako anareo honenana.

²³Aza manaraka ny fanaon’ny firenena izay horoahiko eo anoloanareo; fa noho izy manao ireny ratsy rehetra ireny no nahatonga azy ho halako

²⁴ary nahatonga Ahy hilaza aminareo hoe: ‹Ianareo no handova ny tany, ary Izaho no hanome azy ho lovanareo, dia tany tondra-dronono sy tantely[113]!› Izaho no TOMPO Andriamanitrareo, Izay nanavaka anareo tamin’ny firenena samy hafa.

²⁵Koa tandrovy ny fanavahana momba ny biby madio sy maloto ary ny vorona madio sy maloto; aza mandoto tena amin’ny fikasihana biby maloto na vorona maloto na biby madinika mifanaretsaka ambonin’ny tany, satria efa navahako ho maloto aminareo ireny.

²⁶«Aoka ho masina sady voatokana ho Ahy ianareo, satria Izaho TOMPO dia masina ary efa nanavaka anareo tamin’ny firenena samy hafa mba ho Ahy.

²⁷«Izay lehilahy na vehivavy mamoha angatra na tsindrian-javatra tompoina, dia samy hatao maty tokoa ka torabato no hamonoana azy. Hozakain’izy ireo ny ho faty.»