Read DIEM PROTESTANTA Jeremià 24 Bible Online

Jeremià 24 - DIEM PROTESTANTA bible

Jeremià 24

¹Ary ny TOMPO naneho tamiko aviavy roa sobika izay voapetraka teo anoloan’ny tempoliny. Taorian’ny nitondran’i Nebokadnetsara mpanjakan’i Babilôna an’i Jekônià, zanakalahin’i Jôiakima sady mpanjakan’i Joda, sy ireo mpifehy an’i Joda mbamin’ireo mpahay taozavatra sy mpanefy vy tao Jerosalema ho babo tany Babilôna no nisehoan’izany.

²Ny sobika voalohany dia nisy aviavy tsara dia tsara toy ny aviavy masaka voalohany. Ny sobika faharoa kosa nisy aviavy ratsy loatra ka tsy azo hanina.

³Dia nanontany ahy ny TOMPO hoe: — Inona no hitanao, ry Jeremià? Namaly aho hoe: — Aviavy: ka ny sasany tsara dia tsara, fa ny sasany kosa ratsy loatra ka tsy azo hanina.

⁴Ary nisy indray hafatry ny TOMPO tamiko nanao hoe:

⁵— Izao no lazain’ny TOMPO Andriamanitr’i Israely: Ho tahaka ireto aviavy tsara ireto no hijereko ny Jodeanina voababo izay noroahiko hiala teto amin’ity toerana ity hankany Babilônia.

⁶Fa hojereko am-pitiavana izy ka hampodîko amin’ity tany ity. Haoriko indray izy ka tsy horavako intsony, hamboleko indray ka tsy hongotako intsony.

⁷Homeko azy ny fo miaiky fa Izaho no TOMPO. Hiverina amiko amin’ny fony manontolo ireo; ka ho vahoakako izy, ary Izaho kosa ho Andriamaniny.

⁸Fa ny amin’i Tsedekià mpanjakan’i Joda sy ny manamboninahiny mbamin’ireo mponina sisa tavela ao Jerosalema ary koa ireo olona tsy niala teo amin’ity tany ity sy ireo lasa nipetraka tany Ejipta, dia izao no lazain’ny TOMPO: Hataoko toy ny aviavy ratsy izay tsy azo hanina noho ny haratsiny izy.

⁹Hatolotro ho fampihorohoroana ny fanjakana rehetra eto an-tany izy; ka na aiza na aiza hanapariahako azy, dia ho ohatra fandatsana sy fanarabiana ary fanesoana sy fanozonana izy.

¹⁰Halefako hamely azy ny ady sy ny mosary ary ny areti-mandringana mandra-pahalany ritra azy tsy ho eo amin’ny tany izay nomeko azy sy ny razany.