Read DIEM PROTESTANTA Jeremià 40 Bible Online

Jeremià 40 - DIEM PROTESTANTA bible

Jeremià 40

¹Ary tonga tamin’i Jeremià indray ny teny avy amin’ny TOMPO taorian’ny namotsoran’i Nebozaradàna, lehiben’ny mpiambina azy hiala tao Ramà. Fa nigadra niaraka tamin’ny olon’i Jerosalema sy ny olon’i Joda izay efa hoentin-ko babo any Babilôna i Jeremià.

²Teo izy no nalain’ny lehiben’ny mpiambina ka nilazany hoe: «Ny TOMPO Andriamanitrao no nanambara mialoha izao loza manjo ity tanàna ity izao.

³Ary ankehitriny dia notanterahin’ny TOMPO tokoa izay nambarany, noho ny nanotanareo taminy sy tsy nankatoavanareo izay nolazainy. Izany no nahatonga izao zavatra izao taminareo.

⁴Ankehitriny, indro vahako izao ny gadra eny an-tananao; koa raha tianao ny handeha hiaraka amiko hankany Babilôna, dia andao fa izaho no hiahy anao. Nefa raha tsy tianao izany, dia mijanòna. Hevero ho eo anatrehanao ny tany manontolo, koa mandehàna amin’izay toerana tianao haleha.»

⁵Ary raha mbola nihazohazo teo i Jeremià, dia hoy i Nebozaradàna taminy: «Mahazo miverina any amin’i Gedalià, zanakalahin’i Ahikama sy zafikelin’i Safàna ianao, fa izy no voatendrin’ny mpanjakan’i Babilôna hitondra ireo tanànan’i Joda. Mipetraha miaraka aminy eo anivon’ny vahoaka, ka mandehàna amin’izay toerana tianao haleha.» Dia nomen’ny lehiben’ny mpiambina vatsy sy fanomezana i Jeremià, ary navelany handeha.

⁶Ary i Jeremià nankany amin’i Gedalià zanakalahin’i Ahikama tao Mitsepà, ka niara-nipetraka taminy teo anivon’ny vahoaka izay sisa velona teo amin’ny tany.

⁷Mbola nisy andia-miaramila jodeanina tavela tany an-tsaha; henon’ireo lehibeny sy ireo olom-peheziny fa ny mpanjakan’i Babilôna efa nanendry an’i Gedalià, zanakalahin’i Ahikama hitondra ny tany sy nanankina taminy ny mahantra, dia izay lehilahy sy vehivavy ary ankizy tsy nentina ho babo tany Babilôna.

⁸Koa nanatona an’i Gedalià tao Mitsepà niaraka tamin’ny olom-peheziny ary ireo lehiben’andia-miaramila ireo, fa ireto avy izy: i Jismahela zanakalahin’i Netanià, i Jôhanàna sy i Jônatàna samy zanakalahin’i Karea, i Seraià zanakalahin’i Tanehometa, ireo zanakalahin’i Hôfay avy any Netôfà, ary i Jazanià avy any Mahekà.

⁹Dia nanizingizina tamin’ireo sy tamin’ny olom-peheziny i Gedalià nanao hoe: «Aza matahotra hanompo ny Babilônianina ianareo; monena amin’ny tany ary maneke ny mpanjakan’i Babilôna, fa hahasoa anareo izany.

¹⁰Hipetraka eto Mitsepà aho mba hisolo tena anareo eo anatrehan’ny Babilônianina izay tonga eto amintsika; fa ianareo kosa manangòna divay sy voankazo ary diloilo ka manaova tahiry, ary monena amin’izay tanàna hidiranareo.»

¹¹Tahaka izany koa ireo Jodeanina nitoetra tany amin’ny Môabita sy ny Hamônita sy ny Edômita ary tany amin’ny faritra rehetra hafa, dia samy nahare fa misy ampahany amin’ny vahoaka navelan’ny mpanjakan’i Babilôna ao amin’ny fanjakan’i Joda ary nankininy tamin’i Gedalià zanakalahin’i Ahikama sy zafikelin’i Safàna.

¹²Koa ireny Jodeanina rehetra ireny dia niverina avy any amin’ny toerana izay nandroahana azy, ka tonga tany amin’i Gedalià tao Mitsepà, any amin’ny tanin’i Joda. Dia nanangona divay sy voankazo be dia be ireny.

¹³Indray andro dia tonga nihaona tamin’i Gedalià tao Mitsepà i Jôhanàna zanakalahin’i Karea sy ireo olon-kafa lehiben’ny andia-miaramila izay mbola tany an-tsaha.

¹⁴Nanontany an’i Gedalià izy hoe: — Moa fantatrao tsara ve fa i Bahalisa, mpanjakan’ny Hamônita, dia naniraka an’i Jismahela, zanakalahin’i Netanià, hamono anao? Nefa tsy nino azy i Gedalià.

¹⁵Na izany aza dia tonga nihaona mangingina tamin’i Gedalià tao Mitsepà ihany i Jôhanàna ka nanao taminy hoe: — Aoka aho handeha hamely an’i Jismahela, zanakalahin’i Netanià fa tsy hisy olona hahalala akory? Nahoana no havelanao hovonoiny ho faty ny tenanao? Fa raha matiny ianao, dia hiparitaka indray ny Jodeanina rehetra efa tafangona eto aminao; ary izay hany sisa amin’ny fanjakàn’i Joda dia ho levona.

¹⁶Nefa namaly an’i Jôhanàna i Gedalià ka nanao hoe: — Aza manao izany zavatra izany! Fa tsy marina izay voalazanao momba an’i Jismahela.