Read DIEM PROTESTANTA Jeremià 47 Bible Online

Jeremià 47 - DIEM PROTESTANTA bible

Jeremià 47

¹Hafatry ny TOMPO izay tonga tamin’i Jeremià mpaminany momba ny Filistinina[224], talohan’ny hamelezan’ny Farao an’i Gazà.

²Izao no lazain’ny TOMPO: «Misy ranotrambo mipoitra avy any avaratra[225], ary tonga ranon-driaka misamboaravoara ka manafotra ny tany sy izay rehetra eo aminy, dia ireo tanàna sy ny mponina ao aminy. Mikiakiaka ny olona; ary manao hira fitarainana ny mponina rehetra amin’ny tany.

³Mikatrokatroka ny kitron’ireo soavaly matanjaka mirodorodo ny kalesy ary mikotrokotroka ny kodiarany; ka manadino zanaka ny ray aman-dreny satria efa miraviravy tanana.

⁴Tonga ny andro fandravana ny Filistinina rehetra, hany ka tsy misy olona sisa tavela intsony mba hanampy an’i Tiro sy i Sidôna. Ravan’ny TOMPO tokoa ny Filistinina, dia ireo sisa velona avy any amin’ny nosy Kaftôra[226].

⁵Voaharatra ny lohan’ny ao Gazà fa misaona ary mangina tanteraka ny ao Askelôna. Ianareo sisa tamingan’ny rapetonolona, mandra-pahoviana ianareo no hiteti-tena[227]?

⁶Hoy ianareo hoe: ‹Indrisy ry sabatry ny TOMPO, tsy mba hiato mihitsy ve ianao? Midira ao anaty tranonao, mialà voly ka mijanòna.›

⁷Ahoana moa no hiatoany? Ny TOMPO no manome baiko azy; ary hamely an’i Askelôna sy ny tany amoron-dranomasina no tanjona nanendreny azy.»