Read DIEM PROTESTANTA Jeremià 6 Bible Online

Jeremià 6 - DIEM PROTESTANTA bible

Jeremià 6

¹Mandosira faingana hiala ao Jerosalema, ianareo Benjaminita, mba hitady fialofana any an-kafa. Tsofy ao Tekôa ny anjomara, manaova tsangan’afo ao Bety-Kerèma, satria misy loza sy fandringanana goavana mipoitra avy any avaratra[28].

²Indro rava ianao[29] ry Tsiôna, tanàna tsara tarehy sy miaingitraingitra!

³Fa tonga hatrany aminao ny olona tahaka ny mpiandry ondry sy ny andian’ondriny. Manangana toby manodidina hamelezana anao izy ka mitondra ny andian-tafiny amin’ny tandrify azy.

⁴Miantsoantso ireo hoe: «Ndao hotafihina izy! Mitsangàna isika mba haka azy an-keriny amin’ny mitataovovona! Indrisy, efa mihilana ny andro ary efa mandroso aloka ny hariva!

⁵Mitsangàna isika mba haka azy an-keriny amin’ny alina; aoka horavantsika ireo lapany tsara tarehy!»

⁶Izao no lazain’ny TOMPOn’izao rehetra izao amin’ireto mpanafika an’i Tsiôna: «Mikapà hazo hanaovana tovon-tany mba hamelezana an’i Jerosalema.» Iharan-tsazy io tanàna io fa feno fampahoriana ao aminy.

⁷Mampiboiboika ny faharatsiany toy ny fantsakana mamoaka rano izy. Herisetra sy famoretana no mba re ao. Ratra sy fijaliana no hitako ao mandrakariva.

⁸Minoa anatra ianao, ry Jerosalema; raha tsy izany, dia hihatahako ianao, ka hataoko tanàna lao sy tany tsy honenana.

⁹Izao no lazain’ny TOMPOn’izao rehetra izao: «Tangosy hatramin’ny farany toy ny fitango voaloboka ireo olona sisa amin’i Israely; averimbereno eny amin’ny rantsany madinika toy ny an’ny mpioty voaloboka ny tananao!»

¹⁰Iza no hitenenako, ary iza no hampandrenesina hihaino ahy? Indro tsentsina ny sofiny, ka tsy afaka handre tsara izy. Manala-baràka azy ny teninao, ry TOMPO, ka tsy ankamamîny.

¹¹Feno ny fahatezeranao aho, ry TOMPO, ka tsy mahatsindry izany intsony. Afafazo amin’ny ankizy eny an-dalambe sy amin’ny andian-tanora manontolo izany fahatezerako tsy tantinao izany. Fa na lehilahy na vehivavy na ny antitra na izay efa ela niainana dia samy hosamborina avokoa.

¹²Ho lasan’olon-kafa ny tranony sy ny sahany ary ny vadiny[30], satria hahinjitro ny tanako hamely ny mponina amin’ny tany, hoy ny teny hentitry ny TOMPO.

¹³Izy rehetra, na ny kely na ny lehibe, dia samy mitady tombontsoa avokoa. Na ny mpaminany na ny mpisorona dia samy mpamitaka avokoa.

¹⁴Alasafay fotsiny no nitsaboany ny fahavoazan’ny vahoakako tamin’ny nilazany hoe: «Fiadanana, fiadanana!»; kanjo tsy nisy fiadanana akory[31]!

¹⁵Tokony hahamenatra azy ny zava-maharikoriko nataony; nefa tsy menatra akory izy sady tsy mahatsapa ny hadisoany. Noho izany, hoy ny TOMPO, dia anisan’ireo ho lavo izy; ka amin’ny andro hamaliako azy, no hitrosenany amin’ny tany.

¹⁶Izao no lazain’ny TOMPO: Mijanòna eny an-dalana ianareo ka mandiniha; ary anontanio ny sakeli-dalana fahiny. Tadiavo ny lalana ho amin’ny fahasambarana; araho izany, dia hahita fitsaharana ho an’ny fanahinareo[32] ianareo! Kanefa hoy izy hoe: «Tsy hanaraka izahay!»

¹⁷Nametrahako mpitily teo aminy, hampaneno ny anjomara fanairana. Kanefa hoy izy hoe: «Tsy ahoanay izany!»

¹⁸Koa henoy àry izao, ry firenen-kafa, fantaro tsara izay hanjo azy.

¹⁹Mihainoa, ry mponina rehetra eran-tany: Indro hahatonga loza ho an’io firenena io Aho, dia loza vokatry ny hevi-dratsiny ihany, satria tsy niraharaha ny teniko izy sady naniratsira ny fampianarako.

²⁰Nahoana moa Aho no anafarana vovo-javamanitra avy any Sebà sy veromanitra avy any an-tany lavitra? Tsy sitrako ny sorona dorany manontolo ary tsy teliko ny sorona hafa ataony ho Ahy.

²¹Koa izao no lazain’ny TOMPO: Hasiako zava-mahasolafaka eo anoloan’ity firenena ity; ka samy ho solafaka sy ho faty eo na ny raiamandreny na ny zanany na ny namany sy ny mpiara-monina aminy.

²²Izao no lazain’ny TOMPO: Indro misy vahoaka tonga avy any amin’ny tany avaratra[33], dia firenen-dehibe iray miainga avy any am-paran’ny tany.

²³Mampirangaranga tsipîka sy lefona ireo miaramilany lozabe sady tsy mamindra fo. Mirohondrohona toy ny ranomasina ny feony. Mitaingin-tsoavaly izy ary milahatra toy ny andian-tafika hiady mba hamely anao, ry Tsiôna.

²⁴Renay izany vaovao izany ka niraviravy tanana izahay, sady tratry ny fanaintainana toy ny vehivavy raha miteraka.

²⁵Aza mivoaka ho any an-tsaha, aza mandeha eny an-dalam-be fa ao ny fahavalo mirongo sabatra; ka horohoro hatraiza hatraiza[34].

²⁶Ry vahoakako, misikìna lamba fisaonana ka mihosena amin’ny vovoka; ataovy ny fombafomba rehetra fanao amin’ny fisaonana zanaka lahitokana, ka mitomania fatratra ianareo fa ho avy tampoka ny fahavalo mpandringana.

²⁷Hataoko toy ny misedra vy ianao, ry Jeremià, mba hizaha toetra ny vahoakako: hofantarinao sy hotombananao ny fitondrantenany.

²⁸Mpikomy maditra avokoa izy rehetra, ka mandehandeha manaratsy; mafy noho ny vy na ny halimo izy, ary samy mpanao ratsy avokoa.

²⁹Efa sempotra dia sempotra ny tafoforana, ka tokony ho levona ny firaka noho ny hafanana; nefa very maina ny nandrendrehana ny volafotsy fa tsy mety miala ny taindrendrika.

³⁰Volafotsy tsy misy ilana azy no ilazana ireny olona ireny, satria tsy ilain’ny TOMPO.