Read DIEM PROTESTANTA Fitomaniana 4 Bible Online

Fitomaniana 4 - DIEM PROTESTANTA bible

Fitomaniana 4

¹Indrisy! Nihavasoka ny volamena; efa nihamatroka ilay metaly tsara; ireo vatosoa voatokana ho an’ny Tompo[17] dia niparitaka teny an-dalambe rehetra teny.

²Indrisy! Ireo vaton’i Tsiôna izay sarobidy sady manan-danja toy ny volamena madio dia tonga mitovy vidy amin’ny siny tany, asan-tanan’ny mpanefy tanimanga?

³Na ny amboadia aza dia manolotra nono mba hampinonoana ny zanany; fa ny zanakavavin’ny fireneko kosa tsy mifaditra ovana tahaka ny vorombe[18] any an-taniefitra.

⁴Main’ny hetaheta ireo zaza minono ka miraikitra amin’ny lanilany ny lelany. Mitaky mofo ireo ankizy madinika nefa tsy misy mizara ho azy.

⁵Ireo mpihinana hanim-py dia mitofezaka eny an-dalambe. Ireo nobeazina tamin’ny fitafiana jaky dia mihosinkosina eny an-tobim-pako.

⁶Lehibe noho ny heloky ny tao Sôdôma ny fahotan’ny vahoakako; nefa noravana indray mipi-maso io tanàna io[19] ka tsy nisy nihetsehana akory.

⁷Ny printsiny dia nangatsakatsaka noho ny oram-panala; fotsy noho ny ronono ny fihodirany, mavokely noho ny akoran-driaka ny tenany, ary manga toy ny safira ny lalan-drany.

⁸Fa izao kosa dia mainty noho ny arina ny endriny; ka tsy fantatra intsony izy eny an-dalambe. Miraikitra amin’ny taolany ny hodiny, dia hoditra maina toy ny kitay.

⁹Aleo lavitra aza matin-tsabatra toy izay matin’ny mosary sy mitofezaky ny harerahana satria tsy misy vokatry ny saha.

¹⁰Ny reny tokony ho feno fitiavana aza no nirotsaka nahandro ny zanany; dia izany no nataony sakafo tamin’ny fandringanana nahazo ny vahoakako[20].

¹¹Nanampatra havinirana ny TOMPO ka nampitosaka ny fahatezerany mirehitra. Namelona hain-trano tao Tsiôna Izy handevonana ny fanorenany.

¹²Tsy nanampo na ny mpanjakan’ny tany na ny mponina rehetra amin’izao tontolo izao fa hiditra ao an-tanànan’i Jerosalema ny fahavalony ama-mpandrafy azy.

¹³Fahotan’ny mpaminaniny sy heloky ny mpisorony izay nahafaty ny mpivavaka marina tao an-tanàna no nahatonga izany fahavoazana izany.

¹⁴Toy ny jamba eny an-dalambe ry zareo no niraparapa fandeha sady voahosin-dra; hany ka voarara ny mikasika ny fitafiany[21].

¹⁵Rehefa tonga izy, dia misy miantsoantso hoe: Mihataha ianareo fa maloto izy, mihataha fa aza manatona azy. Raha mandositra izy nefa tsy mahita izay haleha dia hoy ny firenen-kafa hoe: «Tsy mahazo mijanona ela atỳ amintsika ireo!»

¹⁶Ny TOMPO mihitsy no nampiely azy fa tsy te hahita azy intsony. Koa tsy nohajaina ny mpisorona ary tsy niantrana ny zokiolona.

¹⁷Mbola vizana ny masonay miandry foana ny famonjena. Nitazana teo an-tilikambo izahay nanantena firenena tsy hahavonjy.

¹⁸Arahi-maso ny fihetsikay: Tsy afa-mankeny an-kianjanay akory izahay. Manakaiky ny fiafaranay, tapitra ny andronay; eny, migadona ny fiafaranay.

¹⁹Ny mpanenjika anay kosa haingam-pandeha noho ny voromahery eny an-danitra. Manenjika anay hatrany an-tendrombohitra izy, ary manotrika hamely anay any an-taniefitra.

²⁰Ilay niankinan’ny fiainanay, ilay mpanjaka nohosoran’ny TOMPO ka mba efa nilazanay hoe: «Eo ambany fiarovanao no hanananay toerana eo anivon’ny firenen-kafa», dia indro voafandriky ny longoam-pahavalo[22]!

²¹Mifalia sy miravoa ianareo, ry mponin’i Edôma, izay mitoetra ao amin’ny tanin’i Hotsy; saingy handalo aminareo koa ny tsangambavam-panamelohana[23] ka ho mamo sy hiboridana ianareo!

²²Efa tapitra ny famaizana anao, ry Tsiôna, ka tsy hoentina ho babo intsony ianao. Fa ianao kosa, ry Edôma, hovalian’ny Tompo ny fahadisoanao, hovakiny bantsilana ny helokao.