Read DIEM PROTESTANTA Ezekiela 11 Bible Online

Ezekiela 11 - DIEM PROTESTANTA bible

Ezekiela 11

¹Ary ningain’ny Fanahin’ny Tompo aho ka nentiny hankeo amin’ilay vavahady atsinanana amin’ny tranon’ny TOMPO. Tazako teo anilan’ny fidirana ny lehilahy 25 ka anisan’ireny ireo roalahy lehiben’ny vahoaka, dia i Jazanià zanakalahin’i Hazora, sy i Pelatià zanakalahin’i Benaià.

²Ary hoy ny Fanahy tamiko: «Ry ilay taranak’olombelona, ireo no lehilahy manomana asa ratsy sy manolo-tsaina mandoza eto Jerosalema.

³Lazainy hoe: ‹Tsy hanorenana trano intsony eto ao anatin’ny fotoana elaela[44]! Fa ho toy ny vilany ity tanàna ity ary isika no ho hena tahirizina ao anatiny.›

⁴Koa ianao, ry ilay taranak’olombelona, ijoroy ny maha-mpaminany anao, eny, ijoroy ny maha-mpaminany anao mba hanohitra azy.».

⁵Dia nilatsaka tamiko ny Fanahin’ny TOMPO ka nandidy ahy hanambara hoe: «Izao no lazain’ny TOMPO: Fantatro izay teneninareo, ry olon’i Israely, fantatro ny eritreritra tonga ao an-tsainareo!

⁶Efa nahafaty olona maro teto amin’ity tanàna ity ianareo; ary namenoanareo ny lalambe ny fatiny.

⁷Koa hoy Izaho Tompo ANDRIANANAHARY aminareo: toy ny vilany ity tanàna ity, ary ny hena dia ireo efa novonoinareo ho faty teo anivony. Ianareo kosa anefa dia horoahiko tao.

⁸Matahotra ny ady ve ianareo? Raha izany, dia halefako aminareo ny ady. Teny hentitra avy amiko Tompo ANDRIANANAHARY izany!

⁹Horoahiko hiala amin’ity tanàna ity ianareo, ka hatolotro ho eo an-tanàn’ny firenen-kafa; ary hotanterahiko ny didim-pitsarako ny aminareo.

¹⁰Hampihariko aminareo ny fitsarako ato anatin’ny faritr’i Israely, ka hovonoiko ho faty amin’ny ady ianareo. Amin’izay dia hoekenareo fa Izaho no TOMPO.

¹¹Tsy ho toy ny vilany ho anareo ity tanàna ity ary tsy ho toy ny hena tahirizina ao anatiny ianareo; fa hampihariko aminareo ny fitsarako ato anatin’ny faritr’i Israely.

¹²Amin’izay dia hoekenareo fa Izaho no TOMPO Izay tsy nankatoavinareo lalàna sy tsy narahinareo fitsipika, satria nanaraka ny fomban’ireo firenena nanodidina ianareo.»

¹³Raha mbola nampita izany faminaniana izany aho, dia maty i Pelatià[45] zanakalahin’i Benaià. Koa nianjera nihohoka tamin’ny tany aho ary niantso mafy hoe: «Adray, ry Tompo ANDRIANANAHARY ô, haringanao avokoa ve ny Israelita sisa?»

¹⁴Ary nisy tenin’ny TOMPO tamiko nanao hoe:

¹⁵«Ry ilay taranak’olombelona, ny mpiray firenena aminao, ireo havanao israelita rehetra atỳ, dia ilazan’ny mponina eto Jerosalema izao torohevitra izao: ‹Mijanòna lavitry ny TOMPO any ianareo, satria izahay no nomeny ity tany ity ho fanananay›. »

¹⁶Noho izany, ambarao amin’ireo namanao babo fa izao no lazain’ny Tompo ANDRIANANAHARY: «Na dia nalefako any an-tany lavitra sy naeliko any anivon’ny firenen-kafa aza ianareo, dia manatrika anareo Aho tahaka ny ao amin’ny Toeramasina[46] ihany.»

¹⁷Ambarao aminy koa fa izao no lazain’ny Tompo ANDRIANANAHARY: «Hangoniko avy any amin’ny firenena sy ny tany izay nanelezako anareo ianareo, ka homeko ny tanin’i Israely indray.

¹⁸Rehefa tafaverina any ianareo, dia hanaisotra ny fanao mahatsiravina sy maharikoriko rehetra momba ny fanompoan-tsampy izay misy ao.

¹⁹Homeko fo iray ihany ianareo rehetra, ary hametrahako fanahy vaovao ao anatinareo; hoesoriko aminareo ny fo tsy miraika toy ny vato ka hosoloiko fo mora anarina.

²⁰Amin’izay dia hizotra araka ny lalànako rehetra ianareo ary hitandrina ny fitsipiko ka hampihatra azy, dia ho vahoakako ianareo ary Izaho ho Andriamanitrareo[47].

²¹Fa ho an’izay manana fo mirona amin’ny fanao mahatsiravina sy maharikoriko momba ny fanompoan-tsampy dia hataoko mivesatra ny vokatry ny fitondrantenany izy. Teny hentitra avy amiko Tompo ANDRIANANAHARY izany.»

²²Nikopaka elatra ireo kerobima, dia niara-nihetsika taminy koa ireo kodiarana, ary namirapiratra teo amboniny ny voninahitr’ilay Andriamanitr’i Israely.

²³Avy eo dia niakatra niala teo afovoan’ny tanàna ny voninahitry ny TOMPO ka nijanona teo amin’ilay tendrombohitra atsinanan’i Jerosalema.

²⁴Dia tsaroako ho ningain’ny Fanahin’Andriamanitra aho, ka naveriny ho eo anilan’ireo babo tany Babilôna. Tamin’izay dia nitsahatra ny fahitana azoko;

²⁵ary notantaraiko tamin’ireo babo ny zavatra rehetra nasehon’ny TOMPO ahy.