Read DIEM PROTESTANTA Ezekiela 27 Bible Online

Ezekiela 27 - DIEM PROTESTANTA bible

Ezekiela 27

¹Ary nisy tenin’ny TOMPO tamiko nanao hoe:

²«Ry ilay taranak’olombelona, manaova ianao hira fisaonana ny amin’ny tanànan’i Tiro,

³izay miorina eo amin’ny vava-ranomasina, ary manao varotra amin’ny firenena maro eny amoron-dranomasina. Ambarao aminy fa izao no lazain’ny Tompo ANDRIANANAHARY: ‹Ry Tiro[149] ô, Ianao dia nilaza ny tenanao ho sambo tsara tarehy fatratra!

⁴Eny anivon-dranomasina ny faritaninao, ary nataon’ireo mpandrafitra anao ho tsara tarehy fatratra ianao.

⁵Hazo kipreso avy any Senira[150] no nanamboarany manontolo ny vatan-tsambonao; hazo sedera avy any Libano no nalainy hanaovana ny andrin-tsambonao.

⁶Hazo ôaka avy any Basàna no nanaovany ny fivoin-tsambonao. Hazo sedera avy any amin’ny nosy Kitima izay nasiana sisika ivoary no nanamboarany ny tokotanin-tsambonao.

⁷Rongony madinika misoratsoratra avy any Ejipta no natao lain-tsambonao mba ho faneva hamantarana anao. Lamba miloko volomparasy sy jaky avy any amin’ny nosy Sipra no natao labasy hiarovana ny entanao.

⁸Mponina avy any Tsidôna sy Arvada[151] no nampiasainao ho mpivoy; ny olona havanana teo aminao no tantsambonao, ry Tiro ô,

⁹Mpahay taozavatra avy any Biblôsy, izay za-draharaha sady kinga, no mpanamboatra ny simba amin’ny vatan-tsambonao. Ny sambo rehetra izay teny an-dranomasina dia nijanona avokoa teo aminao; ka ny tantsambony no mividy ny entanao.

¹⁰Olona avy any Persia sy Loda ary Ponto[152] no miaramila nanompo tao amin’ny tafikao. Nahantony tao anatin’ny tobinao ny ampingany sy ny fiarovan-dohany, ka nanomezany laza anao izany.

¹¹Vatan-dehilahy avy any Arvada no niambina ny mandanao niaraka tamin’ny miaramilanao, ary olona avy any Gamada no niaro ny tilikambonao. Nanantona ny ampingany teny amin’ny manda manodidina anao[153] izy. Ireo rehetra ireo no nahatonga anao ho tsara tarehy fatratra›. »

¹²«Ny olon’i Tarsîsy[154] no nifanao varotra taminao momba ny harena zavon-tany isan-karazany. Volafotsy sy vy sy vifotsy ary firaka no natolony ho takalon’ny entanao.

¹³Ny olona avy any Gresy sy Tobala ary Mesèka[155] ihany koa dia nifanao varotra taminao, ka olona sy fanaka halimo no natolony ho takalon’ny entanao.

¹⁴Ny terak’i Bety-Tôgarmà[156] no nanolotra ny soavaly hoenti-miasa sy ny soavaly hoenti-miady ary ny boriky ho takalon’ny entanao.

¹⁵Nifandray ara-barotra taminao koa ny olona avy ao Dedàna[157]. Nitatra tamin’ireo nosy maro ny tsenam-barotrao, ka tandroka ivoara sy hazomainty no natakalony ny entanao.

¹⁶Nividy entana betsaka taminao koa ny Edômita[158], ka vato emeralda sy lamba miloko volomparasy, lamba vita peta-kofehy sy rongony fotsy madinika ary koa akorandriaka sy vato robisy no natolony ho takalony.

¹⁷Nifandray ara-barotra taminao koa ny vahoakan’i Joda sy i Israely ka varimbazaha avy any Minita[159] sy ampemba sy tantely sy diloilo ary balsamo no natolony ho takalon’ny entanao.

¹⁸Ny mponin’i Damasy dia nifanao varotra taminao momba ny taozavatrao sy ny harenao zavon-tany isan-karazany. Divay avy any Helbôna sy volonondry avy any Tsahara[160] no nataony takalony.

¹⁹Avy ao an-tanànan’i Ozala ny mponin’i Vedàna sy i Javàna[161] no manolotra ny vy voatefy sy ny kanela ary ny veromanitra ho takalon’ny entanao.

²⁰Ny olona avy any Dedàna kosa nifandray ara-barotra taminao ka nitondra lamba fandrakofan-tsoavaly.

²¹I Arabia sy ireo mpitondra rehetra any Kedara[162] dia nifanao varotra taminao. Zanak’ondry sy ondrilahy ary osilahy no natakalony ny entanao.

²²Ny mpivarotra avy any Sebà sy Rahemà[163] ihany koa dia nifandray ara-barotra taminao ka zava-manitra ambony karazana sy vatosoa ary volamena no natolony ho takalon’ny entanao.

²³Ny ao an-tanànan’i Haràna sy i Kane ary i Hedèna koa dia nifandray ara-barotra taminao toy ireo mpivarotra avy any Sebà mbamin’ireo tanànan’i Asora sy i Kilmady[164].

²⁴Nivarotra fitafiana mihaja taminao izy, ka entiny eny an-tsenanao ny fitafiana miloko volomparasy sy ny lamba vita peta-kofehy, karipetra misoratsoratra ary tady voarandrana mafy.

²⁵Ireo sambo vaventy no mpitatitra ny entam-barotrao.» «Toa sambo feno entana ianao ka navesatra dia navesatra, teny anivon’ny ranomasina.

²⁶[165]Nentin’ireo mpivoinao teny amin’ny ranobe ianao ka ny rivotra avy any atsinanana no nahavaky anao teny anivon’ny ranomasina.

²⁷Ny fanananao sy ny vokatrao mbamin’ny entam-barotrao rehetra, ny tantsambonao sy ny mpanampy azy, ireo mpanamboatra ny simba amin’ny vatan-tsambonao, ireo mpivarotra mpanondrana entana, ny miaramila rehetra niasa tao aminao, ary ny vahoaka rehetra nandeha taminao, dia samy nilentika any an-dranomasina tamin’ny andro naharendrika anao.

²⁸Noho ny fidradradradràn’ireo tantsambonao dia mangovitra ny mponina amoron-tsiraka.

²⁹Miala ny sambony avy ireo mpivoy rehetra sy ireo tantsambo rehetra eny an-dranomasina ka samy maka toerana eny an-tanety.

³⁰Heno migogogogo noho ny manjo anao izy, sady manao fidradradradrana mafy. Mandraraka vovoka amin’ny lohany izy, ary mihosinkosina amin’ny lavenona.

³¹Manaratra loha sady mitafy gony[166] noho ny aminao izy, ka mitomany anao fa mangidy ny manjo ary mangidy ny fisaonany.

³²Tamin’alahelo no niventesany hiram-palahelovana ny aminao, dia hiram-pisaonana manao hoe: Iza no tahaka an’i Tiro izay tonga mangina ankehitriny eo anivon’ny ranomasina?

³³Rehefa tonga avy any an-dranomasina any ianao ka nampidinina ny entam-barotrao, dia firenena maro no voavatsy tamin’izany. Ny habetsahan’ny harenao aman’entanao no nampanan-karena ireo mpanjakan’ny tany.

³⁴Ankehitriny novakîn’ny onjan-dranomasina ianao ary tafalentika ao anaty rano lalimbe. Ny entanao sy ny vahoaka rehetra nandeha taminao dia niaraka rendrika taminao avokoa.

³⁵Nalahelo mafy ny aminao ny mponina rehetra amoron-tsiraka; raiki-tahotra ny mpanjakany ka tonga hatsatra ny endriny.

³⁶Ny mpivarotry ny firenen-kafa dia misiotsioka talanjona ny aminao, satria tonga fampitahorana ianao, sady tsy hisy intsony mandrakizay.»