Read DIEM PROTESTANTA Ezekiela 30 Bible Online

Ezekiela 30 - DIEM PROTESTANTA bible

Ezekiela 30

¹Ary nisy tenin’ny TOMPO tamiko nanao hoe:

²«Ry ilay taranak’olombelona, ijoroy ny maha-mpaminany anao ka ambarao fa izao no lazain’ny Tompo ANDRIANANAHARY: Midradradradrà ny amin’ny andro ho avy ianareo!

³Fa antomotra izy, eny, antomotra ny androm-pamaizan’ny TOMPO. Ho andro vesaran-drahona izany, ary fotoana hifamelezan’ny firenena.

⁴Hiditra any Ejipta ny ady, ka hampangorohoro hatrany Etiôpia izany. Hiampatrampatra ny fatin’ny Ejiptianina, ary horobaina ny hareny ka hatao rava mbamin’ny fanorenany.

⁵Ny olona avy any Etiôpia sy Pota ary Loda, ny olona avy any Arabia manontolo sy Libia, mbamin’ny teraky ny vahoakako aza, dia hisy ho faty an’ady[181].

⁶Izao no lazain’ny TOMPO: Hatreo Migdôla any avaratra ka hatrany Asoana any atsimo dia ho faty an’ady ireo mpiaro an’i Ejipta, ary ho fefika ny tafiny miavonavona; teny hentitra avy amiko Tompo ANDRIANANAHARY izany.

⁷Ho rava dia ho rava ny taniny, ary ho lao dia ho lao ny tanànany.

⁸Ary rehefa hodorako amin’ny afo i Ejipta sady haringako ireo rehetra mpiaro azy, dia hoekena amin’izay fa Izaho no TOMPO.

⁹Amin’izany andro handravako an’i Ejipta izany, dia hisy iraka avy amiko handeha an-tsambo hampandre ny Etiôpianina; ka izy no hampatahotra sy hampangorohoro ny Etiôpianina izay mitoetra tsy manahy. Eny, indro avy izany andro izany.

¹⁰«Izao no lazain’ny Tompo ANDRIANANAHARY: Hampiasaiko i Nebokadnetsara mpanjakan’i Babilôna mba handringana ny mponina maro ao Ejipta.

¹¹Ho avy handrava io tany io izy mbamin’ny miaramilany, izay loza indrindra raha samy tafi-pirenena. Hanatsoaka sabatra hamely ny Ejiptianina ireny ka hameno faty ny tany.

¹²Horitiko ny sakeli-dranon’i Neily ary hatolotro an’ireo olon-dia i Ejipta. Hasaiko simban’ny vahiny izy, ka hofaohiny mbamin’izay rehetra ao aminy. Izaho TOMPO no miteny izany.

¹³«Izao no lazain’ny Tompo ANDRIANANAHARY: Horavako tanteraka ireo sampy sy andriamani-tsiizy an’i Memfîsa[182]. Tsy hisy mpitondra intsony any Ejipta ary hataoko manenika io tany io ny tahotra.

¹⁴Hosimbako i Ejipta ambony, hodorako amin’ny afo ny tanànan’i Tsôhàna ary hampihariko ny didim-pitsarako hamelezana ny tanànan’i Nao[183].

¹⁵Hatosako ao Sina[184] izay tanànamimanda miaro an’i Ejipta ny fahatezerako ary hofongorako ny mponina maro ao Nao.

¹⁶Hodorako amin’ny afo i Ejipta. Hisavoritaka ny mponina ao Sina; ary hisy vaky ny mandan’i Nao ka ho safotry ny rano ilay tanàna.

¹⁷Ho faty an’ady ny tovolahin’i Ôna sy i Py-Beseta[185], ary ny mponina sisa dia hoentina ho babo.

¹⁸Tsy hisy andro mihiratra intsony ao Tahapanehesa[186] rehefa hopotehiko ny herin’i Ejipta ary hatsahatro ny fireharehany. Hisy rahona mainty handrakotra ny tanàna, ary ho lasan-ko babo ny mponina amin’izany faritra izany.

¹⁹Hampihariko ny didim-pitsarako hamelezana an’i Ejipta, ka hoekena amin’izay fa Izaho no TOMPO.»

²⁰Tamin’ny taona faha-11 taorian’ny fahababoana, nony andro fahafiton’ny volana voalohany[187], dia nisy tenin’ny TOMPO tamiko nanao hoe:

²¹«Ry ilay taranak’olombelona, nopotehiko ny sandrin’ny Farao[188] mpanjakan’i Ejipta. Tsy nisy nitsabo na nanome fanafody azy, tsy nisy namehy ny feriny mba hampody ny heriny hahatan-tsabatra indray.

²²Koa Izao no lazain’ny Tompo ANDRIANANAHARY: ‹Hirotsaka hamely ny Farao mpanjakan’i Ejipta Aho. Ny sandriny roa mihitsy no hopotehiko, tsy ilay efa potika ihany fa ilay mbola matanjaka koa, ka hataoko latsaka avy eny an-tanany ny sabany!

²³Ary haeliko any amin’ireo firenena sy haparitako any amin’ny tany samy hafa ny Ejiptianina.

²⁴Homeko tanjaka ny sandrin’ny mpanjakan’i Babilôna ka ny sabatro mihitsy no hapetrako eo an-tanany. Ary ny Farao, izay efa nopotehiko ny sandriny, dia ho faty mitoloko toy ny voaratra eo anoloan’ny fahavalony.

²⁵Eny, hiraviravy tsy hanan-kery ny sandrin’ny Farao; fa homeko tanjaka kosa ny sandrin’ny mpanjakan’i Babilôna, ka ny sabatro mihitsy no hapetrako eo an-tanany sy harangarangany hamelezana an’i Ejipta. Amin’izay dia hoekena fa Izaho no TOMPO.

²⁶Haeliko any amin’ireo firenena sy haparitako any amin’ny tany samy hafa ny Ejiptianina; ka amin’izay dia hoekena fa Izaho no TOMPO›. »