Read DIEM PROTESTANTA Ezekiela 35 Bible Online

Ezekiela 35 - DIEM PROTESTANTA bible

Ezekiela 35

¹Ary nisy tenin’ny TOMPO tamiko nanao hoe:

²«Ry ilay taranak’olombelona, mitodiha manatrika ny tendrombohitr’i Sehìra ianao[212], ka mijoroa ho mpaminany ny amin’ny hamelezako azy,

³ary ambarao aminy fa izao no lazain’ny Tompo ANDRIANANAHARY: ‹Hirotsaka an-tsehatra hamely anao Aho, ry tendrombohitra Sehîra. Hanamparako ny heriko ianao, ka hataoko rava sy lao.

⁴Hataoko tonga korontam-bato ireo tanànanao, ry Edôma, ary ho lao ny taninao; ka amin’izay dia hoekenao fa Izaho no TOMPO.

⁵Hatry ny ela no nankahalanao ny Israelita. Tamin’ny fotoana naharesy azy, fony nihoa-pampana ny heloka vitany[213], dia nataonao ripaky ny ady izy.

⁶Noho izany, velona Izaho Tompo ANDRIANANAHARY ka manao teny hentitra sy mianiana fa hampihosin-dra anao Aho satria fandatsahan-dra no setry hanjohy anao. Noho ianao tsy niahotra nandatsa-dra, dia fandatsahan-dra no setry hanjohy anao.

⁷Hataoko rava sy lao ianao, ry tendrombohitr’i Sehîra ary haringako izay mandalo any.

⁸Hofenoiko faty eny an-tendrombohitrao, ry Edôma, ary hiampatrampatra eny an-kavoananao sy eny an-dohasahanao sy eny amin’ny lalan-driakanao rehetra ireo maty an’ady.

⁹Hataoko taniefitra mandrakizay ny taninao, ka tsy honenana intsony ny tanànanao. Amin’izay dia hoekenao fa Izaho no TOMPO.›

¹⁰«Noho ny nitenenanao hoe: ‹Ndeha halaiko ho fananana ireo firenena roa sy tany roa, dia i Israely sy i Joda izay samy onenan’ny TOMPO›,

¹¹dia izao no lazaiko aminao: ‹Velona Izaho Tompo ANDRIANANAHARY ka manao teny hentitra sy mianiana fa arakaraka ny herisetra sy ny fialonana ary ny fankahalana izay nasehonao tamin’ny Israelita ihany no hataoko aminao. Hampahafantariko ny Israelita ny maha Izaho Ahy, rehefa hanafay anao Aho.

¹²Amin’izay dia hoekenao fa Izaho TOMPO dia efa nandre ny teny fanarabiana nataonao hoe: ‹Anay ny tendrombohitr’i Israely! Efa rava ireny ka nomena anay hivelomanay!›

¹³Nanao teny miavonavona nankaloza Ahy ianao, ary efa reko ireo teny maro nanoheranao Ahy.›

¹⁴«Koa izao no lazain’ny Tompo ANDRIANANAHARY: Satria nifaly[214] ny taninao manontolo, ry Edôma, dia hataoko taniefitra ho anao izy.

¹⁵Faly ianao nahita ny zaratanin’ny vahoaka Israely tonga taniefitra, koa toy izay nanjo azy no hataoko aminao: ho taniefitra ianao, ry tendrombohitr’i Sehîra, izany hoe ry Edôma manontolo. Amin’izay dia hoekena fa Izaho no TOMPO.»