Read DIEM PROTESTANTA Ezekiela 39 Bible Online

Ezekiela 39 - DIEM PROTESTANTA bible

Ezekiela 39

¹«Ianao kosa, ry ilay taranak’olombelona, ijoroy ny maha-mpaminany anao manoloana an’i Gôga, ka ambarao aminy fa izao no lazain’ny Tompo ANDRIANANAHARY: «Hirotsaka an-tsehatra hamely anao Aho, ry Gôga, filoha faratampon’ny vahoakan’i Mesèka sy i Tobala[230].

²Nentiko nirenireny ianao mba hamongorako anao. Nampialako avy any am-parany avaratra ianao hampanafihako ny tendrombohitr’i Israely.

³Avy eo kosa hasiako ianao, ka ho tapaka eny an-tananao ankavia ny tsipîkanao ary hianjera avy eny an-tananao ankavanana ny zana-tsipîkanao.

⁴Ho faty miampatrampatra eny an-tendrombohitr’i Israely ianao sy ny tafikao manontolo ary ireo firenena maro mpomba anao. Homeko hohanin’ireo vorona mpihaza isan-karazany sy ny bibidia ny fatinareo[231].

⁵Eny an-kodahoda no hahafatesanao, satria Izaho no efa nilaza; teny hentitra avy amiko Tompo ANDRIANANAHARY izany.

⁶Handrehetako afo[232] ao amin’ny tanin’i Magôga sy ao amin’ireo mponin’ny nosy izay mihevitra ho milamina. Amin’izay dia hoekena fa Izaho no TOMPO.

⁷Hataoko izay hahalalan’i Israely vahoakako fa tena masina Aho ka tsy havelako hanazimbazimba Ahy intsony izy; amin’izay dia hoeken’ireo hafa firenena fa Izaho no TOMPO, Ilay Masina ao amin’i Israely.

⁸Indro ho avy izany toe-javatra izany ary efa manomboka tanteraka. Izany no andro fitsarana[233] nambarako; teny hentitra avy amiko Tompo ANDRIANANAHARY izany.

⁹Hivoaka ny tanànany ny Israelita, dia handrehitra afo miledaleda handorana ireo fiadian’ny fahavalony. Koa ny ampinga sy ny tsipîka ary ny zana-tsipîka mbamin’ny lefona sy ny langilangy dia hisy hanaovany afo mandritra ny fito taona.

¹⁰Tsy handeha hanangon-kitay any an-tsaha akory ny olona na hikapa hazo any an’ala, fa ireo fiadiana ireo no hataony kitay eo. Hamabo sy handroba ireo efa namabo sy nandroba azy izy; teny hentitra avy amiko Tompo ANDRIANANAHARY izany.

¹¹«Ary amin’ny andro hahatongavan’izany, dia homeko toerana iray handevenana azy any Israely i Gôga, dia ny lohasahan’ny mpandalo ao atsinanan’ny Ranomasina Maty; ka hisakan-dalana ny mpandalo izany fandevenana azy eo izany. Any no handevenana an’i Gôga sy ny tafiny marobe manontolo. Ary hantsoina hoe «Lohasahan’ny tafika maroben’i Gôga» io toerana io.

¹²Haharitra fito volana no handevenan’ny Israelita azy rehetra sy hanadiovany ny taniny[234].

¹³Ny mponina rehetra amin’izany faritra izany dia hifarimbona handevina azy ao avokoa; ary ho rehareha ho azy izany amin’ny andro hanehoako ny voninahitro; teny hentitra avy amiko Tompo ANDRIANANAHARY izany.

¹⁴Rehefa afaka fito volana, dia hisy olona hotendrena hitety tsy an-kitsahatra ny tany mba hanadio azy amin’ny fikarohana sy fandevenana ireo faty[235] sisa tavela eny.

¹⁵Hitety ny tany izy ka raha misy mahita taolan’olona, dia hametraka antontam-bato ho marika eo anilany mba hiavian’ny mpandevina haka azy sy handevina azy ao amin’ny Lohasahan’ny tafika maroben’i Gôga.

¹⁶Hisy koa aza tanàna iray hantsoina hoe Hamônà na hoe tafika marobe. Dia toy izany no hanadiovan’ireo ny tany.»

¹⁷Ary izao koa no lazain’ny Tompo ANDRIANANAHARY tamiko: «Ianao kosa, ry ilay taranak’olombelona, antsoy ny voro-manidina rehetra sy ny bibidia rehetra, ka iteneno hoe: Mivoria eto avokoa avy any rehetra any ianareo, mba hahazo anjara amin’ny sorona izay omaniko ho anareo. Eny an-tendrombohitr’i Israely no hisy izany sorona lehibe izany, ka hihinananareo nofo sy hisotroanareo ra.

¹⁸Hohaninareo ny nofon’ireo miaramila maherifo ary hosotroinareo ny ran’ireo mpitondra an’izao tontolo izao, natolotra ho sorona ho solon’ny ondrilahy sy ny zanak’ondry ary ny osilahy mbamin’ny zanak’omby, izay samy biby natavezina tany Basàna avokoa.

¹⁹Io sorona io no anasako anareo, koa hihinana ny matavy eo ianareo ambara-pahavoky anareo, ary hisotro ny ra ianareo ambara-pahaleo anareo.

²⁰Ao amin’io fanasàko io no hivokisanareo amin’ny soavaly sy ny mpitaingina azy ary ny miaramila maherifo mbamin’ny mpiady isan-karazany; teny hentitra avy amiko Tompo ANDRIANANAHARY izany.

²¹«Hasehoko amin’ny hafa firenena ny voninahitro. Ho hitan’izy rehetra didim-pitsarana izay hampihariko aminy sy ny fahefana izay hampiasaiko aminy.

²²Ary manomboka amin’izay andro izay dia hoeken’ny Israelita fa Izaho no TOMPO Andriamaniny.»

²³«Ho takatr’ireo firenen-kafa fa matoa nentina ho babo ireo Israelita dia noho ny heloka nivadihany tamiko, hoy ny Tompo. Fa niafenako tava ireo, ka natolotro ho eo an-tanan’ny fahavalony mba ho faty an’ady izy rehetra.

²⁴Niafenako tava ireo ho setrin’ny asany maloto amam-pikomiany.

²⁵«Kanefa izao no lazain’ny Tompo ANDRIANANAHARY: Ankehitriny dia hamindrako fo ny Israelita rehetra izay taranak’i Jakôba ka hampodiko avy amin’ny fahababoany; ary hotakîko ny hanajan’ny olona rehetra ny anarako masina.

²⁶Amin’izay dia hohadinoiny ny fahafaham-baràka nanjo azy noho ny hadisoana rehetra nataony tamiko. Hiaina indray am-pilaminana eo amin’ny taniny izy ka tsy hisy hanaitaitra azy.

²⁷Hampodiko avy any amin’ireo hafa firenena izy ary hangoniko avy any amin’ny tanin’ireo fahavalony. Ny ataoko amin’ny Israelita no hanehoako eo imason’ny firenena maro manodidina fa Andriamanitra masina Aho.

²⁸Amin’izay dia hoekeny fa Izaho no TOMPO Andriamaniny, rehefa hangoniko ho eo amin’ny taniny izy, ka tsy hisy havelako any amin’ireo firenena izay nanaovako sesitany azy na iray aza.

²⁹Ny Fanahiko no hatosako amin’ny Israelita, ka tsy hiafenako tava intsony ireo; teny hentitra avy amiko Tompo ANDRIANANAHARY izany.