Read DIEM PROTESTANTA Ezekiela 48 Bible Online

Ezekiela 48 - DIEM PROTESTANTA bible

Ezekiela 48

¹«Ireto no anaran’ireo foko mbamin’ny anjarany avy. Ny anjaran’i Dana dia any amin’ny farany avaratra, hiainga eo amin’ny Ranomasina Mediteranea ka hanamorona ny lalana mankany Hetlôna sy Lebô-Hamata ary Hatsara-Henôna, akaikin’ny fanjakan’i Damasy sy i Hamata, dia hihazo ny sisin-tany atsinanana ka ho tafapaka eo amin’ny Ranomasina Mediteranea any andrefana.

²Mifanolotra amin’ny faritanin’i Dana, hatrany atsinanana ka hatrany andrefana, no hisy ny anjaran’i Asera;

³mifanolotra amin’ny faritanin’i Asera no hisy ny anjaran’i Naftalỳ;

⁴mifanolotra amin’ny faritanin’i Naftalỳ no hisy ny anjaran’i Manase;

⁵mifanolotra amin’ny faritanin’i Manase no hisy ny anjaran’i Efraîma;

⁶mifanolotra amin’ny faritanin’i Efraîma no hisy ny anjaran’i Reobena;

⁷ary mifanolotra amin’ny faritanin’i Reobena no hisy ny anjaran’i Joda[287].»

⁸«Mifanolotra amin’ny faritanin’i Joda, hatreo amin’ny sisin-tany atsinanana ka hatrany amin’ny Ranomasina Mediteranea any andrefana, dia hanavahanareo zaratany iray mitovy halava amin’ny anjaran’ny foko tsirairay fa hirefy 12 km sy sasany ny sakany; ary ao afovoany no hisy ny tempoly.

⁹Ny faritra hatokanareo ho Ahy TOMPO dia hirefy 12 km sy sasany ny lavany ary 10 km ny sakany[288].

¹⁰Ny ampahan’io faritra voatokana io dia homena ny mpisorona, ka hirefy 12 km sy sasany ny lavany avy any atsinanana no miankandrefana, ary 5 km ny sakany avy any avaratra no mianatsimo; ary eo afovoany no hisy ny tempolin’ny TOMPO.

¹¹Izany faritra izany dia ho an’ny mpisorona voatokana avy amin’ny taranak’i Tsadôka[289] izay nitandrina an-tsakany sy an-davany ny fanompoana Ahy Tompo, fa tsy mba nivily nanaraka ny lalan-dison’ny Israelita tahaka ny nataon’ny levita.

¹²Noho izany, dia ho anjarany ny faritra masina tokoa amin’izay natokana ho an’ny Tompo; ary mifanolotra amin’ny faritanin’ny Levita izany.

¹³Ny anjaran’ny Levita dia hitovy amin’ny an’ny mpisorona. Samy hahazo anjara izay mirefy 12 km sy sasany ny lavany ary 5 km ny sakany izy roa tonta.

¹⁴Tsy azo atakalo na amidy na afindra ny tany amin’io faritra izay manan-danja indrindra io, satria voatokana ho an’ny TOMPO.»

¹⁵«Amin’io faritany voatokana ho an’ny Tompo io dia mbola hisy tany sisa izay hirefy 2 km sy sasany ny sakany ary 12 km sy sasany ny lavany. Ho tany tsy masina io fa avela ho an’ilay tanàna; ny manodidina dia hisy ireo zana-bohitra sy ny kijana fiandrasam-biby, fa eo afovoany no hisy ilay tanàna.

¹⁶Ho efamira ny tanàna ka hirefy 2 250 metatra ny lafiny tsirairay.

¹⁷Isaky ny lafiny tsirairay amin’ny tanàna dia hisy toera-malalaka izay mirefy 125 metatra ny sakany.

¹⁸Manaraka ny halavan’ny faritra voatokana ho Ahy Tompo dia mbola hisy tany iray mirefy 5 km ny lavany eo atsinanan’ny tanàna, ary koa tany iray mitovy refy amin’izany eo andrefany. Ireo tany ireo no hanome sakafo ho an’ny mpiasa ao an-tanàna.

¹⁹Izay mpiasa ao amin’io tanàna io dia ho avy amin’ny foko israelita rehetra; ary izy ihany no hamboly ireo tany ireo.

²⁰Ny fitambaran’ny faritra voatokana ho Ahy Tompo dia ho efamira izay mirefy 12 km sy sasany ny lafiny tsirairay avy; ary hakanareo ampahefany izany ho zaratany ho an’ilay tanàna.

²¹Ny sisa dia ho an’ny printsy filoha[290]. Ny anjara taniny kosa dia ho eo an-daniny roa amin’ny faritra voatokana ho Ahy Tompo sy ny zaratany ho an’ilay tanàna. Mifanolotra amin’ireo anjaran’ny sasany izany, ka mirefy 12 km sy sasany manomboka eo amin’ny faritra voatokana ka hatrany amin’ny sisin-tany atsinanana ary manomboka eo amin’ny faritra voatokana ka miankandrefana hatrany amin’ny Ranomasina Mediteranea. Ny faritra voatokana ho Ahy Tompo sy ny tempoly amin’izay dia ho ao afovoany.

²²Ny zaratanin’ny levita sy ny zaratany ho an’ilay tanàna no hampisaraka roa ny tanin’ny printsy filoha izay ho tafatsofoka eo anelanelan’ny faritanin’i Joda eo avaratra ary ny faritanin’i Benjamîna eo atsimo.»

²³«Ny amin’ireo foko sisa mbamin’ny anjarany dia toy izao manaraka izao: ny anjaran’i Benjamîna dia miainga eo amin’ny sisin-tany atsinanana ka hatrany amin’ny Ranomasina Mediteranea any andrefana.

²⁴Mifanolotra amin’ny faritanin’i Benjamîna, avy any atsinanana ka hatrany andrefana, no misy ny anjaran’i Simehôna;

²⁵mifanolotra amin’ny faritanin’i Simehôna ny anjaran’i Jisakara,

²⁶mifanolotra amin’ny faritanin’i Jisakara ny anjaran’i Zebolòna,

²⁷mifanolotra amin’ny faritanin’i Zebolòna ny anjaran’i Gada.

²⁸Ary mifanolotra amin’ny faritanin’i Gada kosa dia ny sisin-tany atsimo, hanomboka ao Tamara any atsinanana, dia hankany amin’ny ranon’i Meribà any Kadesy ary hanaraka ny ranon-driakan’i Ejipta[291] hatrany amin’ny Ranomasina Mediteranea.

²⁹Izany no tany izay hozarainareo antsapaka ho fananan’ireo foko israelita, ary izany no ho anjarany avy. Teny hentitra avy amiko Tompo ANDRIANANAHARY izany.»

³⁰«Ireto no fidirana roa ambin’ny folo hankao amin’ny tanànan’i Jerosalema, fidirana izay samy hitondra ny anaran’ny foko iray avy amin’i Israely. Amin’ny lafiny avaratra izay mirefy 2 250 metatra dia hisy vavahady telo: dia ny an’i Reobena sy ny an’i Joda ary ny an’i Levỳ[292].

³²Amin’ny lafiny atsinanana izay mirefy 2 250 metatra dia hisy vavahady telo: dia ny an’i Jôsefa sy ny an’i Benjamîna ary ny an’i Dana.

³³Amin’ny lafiny atsimo izay mirefy 2 250 metatra dia hisy vavahady telo: dia ny an’i Simehôna sy ny an’i Jisakara ary ny an’i Zebolòna.

³⁴Ary amin’ny lafiny andrefana izay mirefy 2 250 metatra dia hisy vavahady telo: dia ny an’i Gada sy ny an’i Asera ary ny an’i Naftalỳ.

³⁵Ny manodidina ny tanàna dia mirefy sivy arivo metatra. «Manomboka hatreo ny tanàna dia hantsoina hoe ‹Ny TOMPO no ao[293]›. »