Read DIEM PROTESTANTA Ezekiela 5 Bible Online

Ezekiela 5 - DIEM PROTESTANTA bible

Ezekiela 5

¹Hoy ny Tompo tamiko: «Makà sabatra maranitra ianao, ry ilay taranak’olombelona, ka ampiasao ho toy ny hareza izany. Kikiso ny volondohanao sy ny volombavanao[16], dia lanjao izay voaharatrao ary tsinjarao telo.

²Rehefa tapitra ny fotoanan’ny fahirano, dia hodoranao amin’ny afo harehitrao eo afovoan-tanàna ny ampahatelony. Ny ampahatelony hafa kosa hotetitetehinao amin’ny sabatra manodidina ny tanàna. Ary ny ampahatelony sisa haelinao eny amin’ny rivotra, ka Izaho no hanatsoaka sabatra hoenti-manenjika azy.

³«Kanefa hakanao ampahany kely ireo volo ireo ka hafeninao anaty paosin’akanjonao.

⁴Hanalanao singam-bolo vitsivitsy amin’izany mba hatorakao ao anaty afo ka hodoranao: ireny no hamelona afo hanatratra ny vahoakan’i Israely rehetra.

⁵«Izaho Tompo ANDRIANANAHARY dia manambara hoe: «Izany no hanjo an’i Jerosalema izay tanàna napetrako eo anivon’ny hafa firenena sy voahodidin’ny tanin’ireo.

⁶Tsy nankatò ny fitsipiko aman-dalàko anefa ny mponin’i Jerosalema fa nanao ratsy mihoatra noho ireo hafa firenena nifanila taminy ary mihoatra noho ireo tany nanodidina azy. Eny, nolaviny ny fitsipiko ary tsy narahiny ny lalànako.

⁷Koa Izaho Tompo ANDRIANANAHARY no manambara aminy hoe: Nikomy tamiko mihoatra noho ireo firenena manodidina anareo ianareo. Tsy nitondra tena araka ny lalànako ianareo ary tsy nanatanteraka ny fitsipiko, fa nanaraka ny an’ireo hafa firenena manodidina anareo aza.

⁸Koa hamafisiko indray fa Izaho Tompo ANDRIANANAHARY mihitsy no hamely anareo, ry mponin’i Jerosalema. Hampihariko eo afovoan-tanàna ho hitan’ny hafa firenena ny didim-pitsarako.

⁹Hataoko aminareo izay tsy mbola nataoko mihitsy sady tsy hataoko intsony any aoriana, satria maharikoriko ny fanompoan-tsampy rehetra vitanareo.

¹⁰Koa ny ray aman-dreny hihinana ny zanany ary ny zanaka kosa hihinana ny ray aman-dreniny[17]. Hampihariko ny didim-pitsarako momba anareo, ka haeliko amin’ny vazan-tany rehetra izay sisa tavela eo aminareo.

¹¹«Eny, velona Izaho Tompo ANDRIANANAHARY ka manao izao teny hentitra izao: Holevoniko tsy misy indrafo na fiantrana ianareo, satria nolotoinareo tamin’ny fanaonareo mahatsiravina sy ny sampinareo maharikoriko[18] ny tempoliko.

¹²Ny ampahatelonareo ho fatin’ny areti-mandringana sy mosary ao an-tanàna; ny ampahatelo ho fatin’ny sabatra eny manodidina; ary ny ampahatelo haeliko any amin’ny vazan-tany rehetra ka hanatsoaka sabatra Aho hoenti-manenjika azy.

¹³Hampihariko hatramin’ny farany ny fahatezerako ary hanaranako fo ny fahavinirako ka hampariko aminareo ny valifatiko. Amin’izay dia ho fantatrareo fa Izaho TOMPO no niteny izany taminareo satria tsy zakako ny fivadihanareo, ka nampihariko taminareo hatramin’ny farany ny fahavinirako.

¹⁴Ny mponin’ireo tany manodidina sy ireo mpandalo rehetra dia hahita fa nataoko tanàna lao sy fandatsa i Jerosalema.

¹⁵Hampihariko ny didim-pitsarana hamelezana io tanàna io amim-pahatezerana sy amim-pahavinirana ary amim-panakianana mivaivay. Amin’izay ny hafa firenena manodidina azy dia hanao azy ho fandatsa sy ho fihomehezana ary koa ho fampitandremana sy ho fampitahorana. Izaho TOMPO no miteny izany aminareo.

¹⁶«Hampijaliako amin’ny mosary ianareo mba haharingana anareo. Hampahory anareo tahaka ny zana-tsipîka mahafaty izany. Hosimbàko ny tahiri-mofonareo ka ho faty mosary ianareo.

¹⁷Ny mosary sy ny biby masiaka izay halefako hamely anareo no hahafaty ny zanakareo; ny areti-mandringana sy ny herisetra dia handroso eo aminareo ary ny ady kosa hataoko mihatra aminareo. Izaho TOMPO no miteny izany aminareo.»