Read DIEM PROTESTANTA Ezekiela 9 Bible Online

Ezekiela 9 - DIEM PROTESTANTA bible

Ezekiela 9

¹Avy eo dia reko niteny mafy tamiko ny Tompo nanao hoe: «Manatòna ianareo natao hanafay ny tanàna ka samia mitondra ny fitaovam-pandravana eny an-tanany avy.»

²Dia indreo lehilahy enina nipoitra teo amin’ny vavahady ambony, izay tamin’ny lafiny avaratry ny tempoly, sady samy nitondra ny fitaovam-pandravàny avy. Nisy lehilahy iray niakanjo rongony[37] teo afovoany sady mitondra fitaovam-panoratana teny amin’ny fehikibony. Niditra izy rehetra ka nijanona teo akaikin’ny alitara halimo.

³Ny voninahitr’ilay Andriamanitr’i Israely izay niseho teo ambony kerobima dia niakatra ho eo amin’ny tokonam-baravaran’ny tempoly. Ary niantso ilay lehilahy niakanjo rongony izay nitondra fitaovam-panoratana ny TOMPO,

⁴ka nanao taminy hoe: «Mandehana mamakivaky eran’ny tanànan’i Jerosalema, ka asio marika eny an-kandrin’izay rehetra mitaraina sy malahelo noho ny fomba rehetra maharikoriko atao eo aminy.»

⁵Avy eo dia reko Izy nanome baiko ireo sisa hoe: «Manaraha io lehilahy io eran’ny tanàna, ka vonoy ny mponina. Aza antra fijery azy ianareo, ary aza mamindrafo aminy.

⁶Aringano na antitra na tanora, mbamin’ny tovovavy sy ny ankizy ary ny vehivavy. Kanefa aza kasihina izay mitondra ilay marika[38]. Atombohy eto amin’ny Toeramasiko izany.» Dia nanomboka namono ireo loholona izay teo anoloan’ny tempoly izy.

⁷Ary ny Tompo nibaiko azy hoe: «Lotoy ny tempoly, fenoy fatin’olona ny kianjany[39], dia mandehana.» Dia lasa ireo ka nanohy ny fandringanana tao an-tanàna.

⁸Izaho irery sisa nijanona teo nandritra ny famelezana, ka niankohoka tamin’ny tany ary niantsoantso hoe: — Tompo ANDRIANANAHARY ô, raha manampatra ny fahatezeranao amin’i Jerosalema ve ianao dia handringana hatramin’ny Israelita sisa?

⁹Ary namaly ahy Izy hoe: — Tsy hita lany mihitsy ny heloka nataon’ny fanjakàn’i Israely sy i Joda: feno vonoan’olona ny tany sady feno fitsarana miangatra ny tanàna. Ary ny olona dia nifampiteny hoe: «Efa nandao ny tanintsika ny TOMPO ka tsy mahita antsika.»

¹⁰Noho izany dia tsy ho antra fijery azy Aho ary tsy hamindrafo aminy; fa hataoko mivesatra ny vokatry ny fitondrantenany izy.

¹¹Tamin’izay dia tonga nanao tatitra ilay lehilahy niakanjo rongony ka nanao tamin’Andriamanitra hoe: — Efa notanterahiko izay nandidianao ahy.