Read DIEM PROTESTANTA Daniela 12 Bible Online

Daniela 12 - DIEM PROTESTANTA bible

Daniela 12

¹«Hoy koa ilay anjely tamiko: ‹Amin’izany fotoana izany dia hitsangana i Mikaela[111], ilay filoha lehibe, izay mijoro homba ny firenenao; ary hisy fotoana mampahory[112] tsy mbola nisy toy izany hatrizay nisiam-pirenena ka hatramin’io fotoana io. Ary amin’izany fotoana izany dia ho voavonjy ny olona rehetra anisan’ny firenenao, ka hita voasoratra ao amin’ny boky[113].

²Ary olona marobe izay matory ao amin’ny vovoka ao am-pasana no hifoha: ny sasany ho amin’ny fiainana mandrakizay ary ny sasany ho amin’ny henatra sy ny zava-mahatsiravina mandrakizay[114].

³Ary ireo hendry dia hamirapiratra toy ny famirapiratry ny lanitra; ary izay nampianatra ny maro ho marina dia hamirapiratra tahaka ny kintana mandrakizay mandrakizay.

⁴«Ry Daniela, ahorony hiafina ireo teny ireo ka asio tombo-kase tsy ho azo sokafana ity boky ity ambara-pahatongan’ny fotoana farany; ho maro amin’izay no hamaky azy ka hitombo fahalalana[115].

⁵«Izaho Daniela dia nijery hatrany ilay fahitana ka indro nisy olona roa hafa nitsangana, ny anankiray teto amoron’ny ony an-kilany ary ny anankiray terỳ amoron’ny ony andaniny.

⁶Ary ny anankiray tamin’ireo no niteny tamin’ilay lehilahy nitafy rongony fotsy[116] teo ambonin’ny ranon’ny ony ka nanao hoe: ‹Rahoviana no hifarana ireo zava-mahagaga ireo?›

⁷Ary ilay lehilahy nitafy rongony fotsy teo ambonin’ny ranon’ny ony nanangana ny tanany ankavanana sy ankavia ho amin’ny lanitra ka reko niteny hoe: ‹Amin’Ilay Andriamanitra velona mandrakizay no ianianako fa telo taona sy tapany[117] no haharetan’ireo zavatra ireo; ary hifarana ireo rehefa ho montsana tanteraka ny herin’ilay vahoakan’Andriamanitra.›

⁸«Izaho Daniela dia nandre izany nefa tsy nahafantatra ny heviny, ka nanontany hoe: ‹Tompoko, hanao ahoana no hiafaran’ireo zavatra ireo?›

⁹Fa namaly izy hoe: ‹Ry Daniela, mandehana fa efa voahorona hiafina ireo teny ireo sady voaisy tombokase tsy ho azo sokafana mandra-piavin’ny fotoana farany.

¹⁰Maro no hodiovina sy hofotsiana ary hosedraina[118]; ny olon-dratsy[119] kosa tsy hisy hahafantatra ny heviny ka mbola hanao ratsy ihany, fa ny hendry no hahafantatra.

¹¹Ary manomboka amin’ny fotoana hampitsaharana ny sorona fanao isan’andro ka hampidirana ilay fanimbazimbana mahatsiravina dia hisy 1 290 andro[120].

¹²Sambatra izay hiandry ka hahatratra ny 1 335 andro.

¹³Fa ianao, ry Daniela, mizora hatramin’ny farany; dia hiala sasatra ianao ka hitsangana handray ny valisoanao amin’ny andro farany.› »