Read DIEM PROTESTANTA Hamôsa 8 Bible Online

Hamôsa 8 - DIEM PROTESTANTA bible

Hamôsa 8

¹Ary izao indray no nasehon’ny Tompo ANDRIANANAHARY ahy tamin’ny fahitana: indro nisy voankazo masaka iray harona.

²Dia nanontany ahy Izy hoe: — Inona no hitanao, ry Hamôsa? Ka novaliako hoe: — Voankazo masaka iray harona! Dia hoy ny TOMPO tamiko: — Tonga ny farany ho an’ny Israely vahoakako, tsy holeferiko intsony ny fahadisoany[55].

³Amin’izany andro hiaviako izany, ireo vehivavy mpihira[56] ao an-dapa dia hanao hiram-pisaonana. ho marobe ny faty ka fahanginana no hanjaka hatraiza hatraiza. Izaho Tompo ANDRIANANAHARY no manao izany teny hentitra izany.

⁴Mihainoa izao ianareo te hitelina ny mahantra sy te hamongotra ny mpandefitra eto amin’ny tany,

⁵ka velom-panontaniana anakampo hoe: Rahoviana no hifarana ny fetin’ny tsinam-bolana ka hivarotantsika vary? Rahoviana no hifarana ny sabata, mba hanokafantsika ny sompitra? Hohakelezintsika ny zinga famarana, hampitombointsika ny vato fandanjana, mizàna mandainga no hampiasantsika,

⁶ary hatramin’ny vary loha-kororoka no hamidintsika. Hovidintsika ho andevo ireo fadiranovana sy mahantra, noho izy tsy mahaloa na ny vidin-kapa iray lomisy aza.

⁷Ny TOMPO, Izay reharehan’ny taranak’i Jakôba, dia nanao fianianana hoe: «Tsy hisy hohadinoiko mandrakizay ny asa ratsy rehetra nataonareo!»

⁸Noho izany, dia hihorohoro ny tany ary hisaona ny mponina rehetra ao aminy; eny, hihorohoro tokoa ny tany tontolo, ka hisondrotra sy hietry tahaka an’i Neily onin’i Ejipta[57].

⁹Ny Tompo ANDRIANANAHARY dia manao teny hentitra hoe: «Izao no hiseho amin’izany andro izany: halentiko mitatao vovonana ny masoandro ary hohamaiziniko antoandro ny tany;

¹⁰havadiko ho fisaonana ny fetinareo ary ho fitomaniana ny hiram-pifalianareo; hosikinako lamba gony ianareo rehetra sady hosolako loha[58] ka hataoko tahaka ny olona misaona zanaka lahitokana; ary ho tahaka ny androm-pahoriana mangidy no fiafaran’izany.»

¹¹Ny Tompo ANDRIANANAHARY dia manao teny hentitra hoe: «Indro avy ny andro izay handefasako mosary amin’ny tany: tsy hoe ho mosarena mofo ny olona na hangetaheta rano fa haniry mafy handre ny teniko.

¹²Dia hivezivezy avy any atsimo ka hatrany andrefana ary hitotototo avy any avaratra ka hatrany atsinanana ny olona mba hitady ny teniko, nefa tsy hahita.

¹³Amin’izany andro izany, dia ho torana azon’ny hetaheta ireo tovovavy tsara tarehy mbamin’ny tovolahy.

¹⁴Ireo mpianiana amin’ny sampin’i Samaria sy ireo mpiteny hoe: ‹Velona ny andriamanitrao, ry Dana!› na hoe: ‹Velona ny andriamanitrao, ry Beera-Seba[59]...!› dia ho lavo ka tsy hiarina intsony.»