Read DIEM PROTESTANTA Hôbadià 1 Bible Online

Hôbadià 1 - DIEM PROTESTANTA bible

Hôbadià 1

¹Nisehoam-pahitana i Hôbadià, ka izao no voalazan’ny Tompo ANDRIANANAHARY ny amin’i Edôma[1]. Nisy iraka nalefa ho any amin’ny hafa firenena, ka renay nanambara filazana avy amin’ny TOMPO hoe: «Mitsangàna ianareo! Aoka isika hiara-mitsangana hanafika an’i Edôma!»

²«Indro ianao, ry Edôma, fa hataoko osa indrindra eo amin’ny firenena; ka hotsiratsiraina izaitsizy ianao!

³Ny avonavon’ny fonao no nahavery saina anao! Mitoetra eny an-tsefatsefaky ny harambato ianao, faritra avobe no misy ny fonenanao[2], ka hoy ianao anakampo hoe: «Iza no hampivarina ahy ho eny an-tany ambany?»

⁴Na dia miakatra ambony tahaka ny voromahery aza ianao sy mametraka ny akaninao eny amin’ny kintana, dia havariko avy eny ianao: teny hentitra avy amiko TOMPO[3] izany!

⁵Raha misy mpangalatra na mpandroba tonga alina ao aminao, moa tsy hindaosiny avokoa ve izay zavatra azony entina? Indrisy fa fongotra ianao[4]! Raha misy mpioty voaloboka tonga eo aminao, moa tsy voaloboka hotsimponina ve no havelany?

⁶Endrey izany fisavàn’ny olona ireo fanananao, ry taranak’i Hesao[5]! Endrey izany fikarohana ny harenao miafina!

⁷Ny olona rehetra izay nanao fifanekena taminao no mandroaka anao hatrany ivelan’ny sisin-taninao. Ny olona tsara fihavanana taminao no mamitaka anao ka naharesy anao. Ireo niara-nisakafo taminao no mamela-pandrika eo amin’ny lalan-kodiavinao. Ka hoy ireo ny aminao hoe: ‹Tsy misy matsilo saina intsony ao aminy›.

⁸Amin’izany andro izany manko no hamongorako ireo olon-kendry ao Edôma sy ireo matsilo saina ao amin’ny tendrombohitr’i Hesao: teny hentitra avy amiko TOMPO izany!

⁹Dia ho raiki-tahotra mafy ny lehilahy maherinao, ry Temàna[6]; ka haringana avokoa ny mponina ao amin’ny tendrombohitr’i Hesao.

¹⁰«Noho ny taranak’i Jakôba rahalahinao efa nisetrasetranao sy novonoinao[7], dia ho safo-kenatra sy haringana mandrakizay ianao!

¹¹Nitsangan-kamely ny Israelita[8] ianao, tamin’ny andro nandresen’ny vahiny ny tafiny sy nidiran’ny hafa firenena tao an-tanànany; fony nozarain’ny vahiny antsapaka ny fananan’i Jerosalema, dia niray tetika taminy koa ianao.

¹²Tsy tokony ho finaritra nijery ireo rahalahinao ianao tamin’ny andro nahitany loza; tsy tokony ho nifaly ny amin’ny taranak’i Joda ianao tamin’ny andro nandringanana azy; ary tsy tokony ho nanao teny miavonavona ianao tamin’ny andro nampahory azy;

¹³tsy tokony ho niditra ilay tanànan’ny vahoakako ianao tamin’ny andro nandravana azy; tsy tokony ho finaritra nijery ny fahantràny ianao tamin’ny andro nandravana azy; ary tsy tokony ho naninji-tanana haka ny fananany ianao tamin’ny andro nandravana azy;

¹⁴tsy tokony ho namitsaka teo an-tsampanan-dalana ianao mba hamono izay afa-nandositra taminy; tsy tokony ho natolotrao ny fahavalo ireo sisa tavela tamin’ny andro nampahory azy;

¹⁵satria efa antomotra ny andro hiavian’ny TOMPO ka hamelezany ny firenena rehetra. Amin’izany, dia araka ny nataonao ny hafa no hatao anao koa; ary hatsingerina aminao ny asa ratsinao.

¹⁶«Ianareo, ry Israelita, dia efa nisotro ny fahatezerako teo an-tendrombohitro masina[9]; toy izany koa no hisotroan’ny firenena azy tsy an-kiato: eny, hisotro ny fahatezerako izy ka hivembena, ary dia ho fongana toy ny tsy nisy akory.

¹⁷Ho ao an-tendrombohitra Tsiôna kosa ireo sisa tavela, ka hanjary masina indray io toerana io; ary ho lasan’ny taranak’i Jakôba ny tanin’ireo naka ny taniny[10].

¹⁸Ny taranak’i Jakôba ho toy ny afo, ny taranak’i Jôsefa ho toy ny lelafo; ny taranak’i Hesao[11] kosa ho toy ny mololo ka harehitr’ireo sy holevoniny, ary tsy mba hisy sisa tavela amin’ny taranak’i Hesao. Izaho TOMPO no efa niteny!»

¹⁹Ny mponin’i Joda, faritra atsimo, no hahalasa ny tendrombohitr’i Hesao; ny mponin’i Joda, faritr’i Sefelà, no hahalasa ny tanin’ny Filistinina sady hahalasa ny tanin’i Efraîma, izany hoe ny tanin’i Samaria; ary ny taranak’i Benjamîna no hahalasa an’i Gilehàda[12].

²⁰Ny babo tamin’ny Israelita, izay tafika marobe, no hahalasa ny tanin’ireo Kanahanita hatrany Tsarefàta. Ny babo tamin’ny mponin’i Jerosalema, izay any Sefaràda[13], no hahalasa ny tanàna any Negèba;

²¹rehefa afaka amin’ny fahababoana ireo, dia hiakatra ho ao an-tendrombohitra Tsiôna mba hifehy ny tendrombohitr’i Hesao. Amin’izay ny TOMPO mihitsy no ho mpanjaka.