Read DIEM PROTESTANTA Nomerỳ 1 Bible Online

Nomerỳ 1 - DIEM PROTESTANTA bible

Nomerỳ 1

¹Izao no nolazain’ny TOMPO tamin’i Mosesy tany an-taniefitr’i Sinay, tao amin’ny Tranolay fihaonana, ny andro voalohan’ny volana faharoa tamin’ny taona faharoa nialan’ny Israelita tany Ejipta:

²— Ataovy ny fanisana[1] ny fiangonan’ny Israelita rehetra araka ny fokony sy ny fianakaviany avy, ka raiso tsirairay ny anaran’ny lehilahy rehetra,

³dia izay vatan-dehilahy feno roapolo taona no ho miakatra ka mahatam-piadiana. Ianao sy i Aharôna no hanisa ireo araka ny tafika misy azy avy.

⁴Aoka hisy lehilahy anankiray isam-poko, dia lehilahy izay tokony ho filoham-pianakaviana, mba hanampy anareo.

⁵Ireto avy ny anaran’ireo lehilahy hanampy anareo: i Elitsora zanak’i Sedeòra no avy amin’ny fokon’i Reobena;

⁶i Selomiela zanak’i Tsorisaday no avy amin’ny fokon’i Simehôna;

⁷i Nahasôna zanak’i Haminadaba no avy amin’ny fokon’i Joda;

⁸i Natanaela zanak’i Tsohara no avy amin’ny fokon’i Jisakara;

⁹I Eliaba zanak’i Helôna no avy amin’ny fokon’i Zebolòna;

¹⁰i Elisamà zanak’i Hamihoda no avy amin’ny fokon’i Efraîma zanak’i Jôsefa; i Gamaliela zanak’i Pedahatsoro no avy amin’ny fokon’i Manase zanak’i Jôsefa;

¹¹I Abidàha zanak’i Gidehônỳ no avy amin’ny fokon’i Benjamîna;

¹²i Ahihezera zanak’i Hamisaday no avy amin’ny fokon’i Dana;

¹³i Pagihiela zanak’i Hôkrana no avy amin’ny fokon’i Asera;

¹⁴i Eliasafa zanak’i Dehoela no avy amin’ny fokon’i Gada;

¹⁵Ahira zanak’i Henàna no avy amin’ny fokon’i Naftalỳ.

¹⁶Ireo no filoham-pianakaviana voafidin’ny fiangonana sady filohan’ny miaramilan’i Israely ihany koa.

¹⁷Nalain’i Mosesy sy i Aharôna ho lefiny ireo olona voatonona anarana ireo,

¹⁸ka novoriny ny fiangonana manontolo tamin’ny andro voalohan’ny volana faharoa, dia nosoratany ny anaran’ny lehilahy israelita rehetra feno roapolo taona no ho miakatra araka ny fianakaviany sy ny fokony avy[2],

¹⁹mifanaraka amin’ny nandidian’ny TOMPO an’i Mosesy. Tao an-taniefitr’i Sinay no nanaovany ny fanisana.

²⁰Ny isam-pokon’i Israely no nanaovam-panisana araka ny tarika sy ny fianakaviany avy, ka nanoratana ny anaran’ny lehilahy rehetra feno roapolo taona no ho miakatra ka mahatam-piadiana. Natomboka tamin’ny fokon’i Reobena lahimatoan’i Jakôba izany. Toy izao manaraka izao ny isa azo:[3] Ny fokon’i Reobena: — 46 500 Ny fokon’i Simehôna: — 59 300 Ny fokon’i Gada: — 45 650 Ny fokon’i Joda: — 74 600 Ny fokon’i Jisakara: — 54 400 Ny fokon’i Zebolòna: — 57 400 Ny fokon’i Efraîma zanakalahin’i Jôsefa: — 40 500 Ny fokon’i Manase zanakalahin’i Jôsefa: — 32 200 Ny fokon’i Benjamîna: — 35 400 Ny fokon’i Dana: — 62 700 Ny fokon’i Asera: — 41 500 Ny fokon’i Naftalỳ: — 53 400

⁴⁴Ireo no vokatry ny fanisam-bahoaka izay nataon’i Mosesy sy i Aharôna ary izy roambinifolo lahy filoham-pianakaviana solotenan’ny fokony avy.

⁴⁵Ka ny lehilahy israelita voaisa, feno roapolo taona no ho miakatra ka mahatam-piadiana,

⁴⁶dia 603 550[4] no fitambarany.

⁴⁷Fa tsy mba natao fanisana niaraka tamin’ny Israelita hafa ny Levita[5].

⁴⁸Hoy manko ny TOMPO tamin’i Mosesy:

⁴⁹«Aza isaina ny fokon’i Levỳ, ary aza anaovana fanisana miaraka amin’ny Israelita hafa izy.

⁵⁰Fa ampiandraiketo azy kosa ny fitandremana ny Fonena-masina izay nametrahana ny raki-tsoratry ny fanekempihavanana ary koa ny fanaka sy ny kojakoja rehetra momba azy. Ireo no hitondra ny Fonena-masina mbamin’ny fanaka rehetra momba azy sy hanao fanompoam-pivavahana ao aminy ary hitoby manodidina azy.

⁵¹Rehefa hiainga kosa ny Fonena-masina, dia ny Levita no hangorona azy; ary rehefa hijanona ny Fonena-masina, dia ny Levita no hanangana azy. Fa izay olon-kafa mitady hanatona eo dia hatao maty.

⁵²Ny Israelita dia samy hitoby eo amin’ny tobiny avy sy eo akaikin’ny vondron-tafiny avy.

⁵³Fa ny Levita kosa dia hitoby manodidina ny Fonena-masina mba tsy hirehitra amin’ny fiangonan’ny Israelita ny fahatezerako.»

⁵⁴Notanterahin’ny Israelita avokoa izany, araka izay efa nandidian’ny TOMPO an’i Mosesy.