Read DIEM PROTESTANTA Nomerỳ 12 Bible Online

Nomerỳ 12 - DIEM PROTESTANTA bible

Nomerỳ 12

¹Nanome tsiny an’i Mosesy i Miriama sy i Aharôna noho ny nanambadiany vehivavy kosita[42], fa nampakatra vehivavy kosita tokoa izy.

²Hoy izy mianadahy hoe: — I Mosesy ihany ve no nitenenan’ny TOMPO, fa tsy izahay koa? Dia ren’ny TOMPO izany.

³I Mosesy kosa dia lehilahy malemy fanahy mihoatra noho ny olona hafa rehetra ambonin’ny tany.

⁴Tampoka teo dia hoy ny TOMPO tamin’i Mosesy sy i Aharôna ary i Miriama: — Mankanesa ianareo telo mianadahy ao amin’ny Tranolay fihaonana. Dia nankany izy ireo.

⁵Nidina tanatin’ny andry rahona ny TOMPO[43] ka nijoro teo am-baravaran’ny Tranolay ary niantso an’i Aharôna sy i Miriama. Dia samy nandroso izy mianadahy,

⁶ka hoy ny TOMPO taminy: — Henoy tsara ny teniko: Raha misy mpaminany eo aminareo, dia amin’ny fahitana no isehoako aminy, ary amin’ny nofy no itenenako aminy.

⁷Fa tsy mba toy izany kosa i Mosesy mpanompoko izay olona mahatoky tamin’ny fiandraiketana ny tranoko manontolo[44].

⁸Mifanatrika no itenenako aminy, dia amin’ny teny mazava fa tsy miafina; ary mahita Ahy TOMPO miseho aminy izy; koa nahoana ianareo no tsy natahotra hanome tsiny an’i Mosesy mpanompoko?

⁹Tezitra mafy tamin’izy mianadahy ny TOMPO ka lasa nandeha.

¹⁰Rehefa nisandratra ho eo ambonin’ny Tranolay ny rahona, dia indro feno pentina fotsy toa oram-panala i Miriama fa boka. Nijery azy i Aharôna ka nahita fa boka ny anabaviny.

¹¹Ka hoy i Aharôna tamin’i Mosesy: — Meloka izahay, tompoko, koa aoka re tsy havalinao aminay izany toetran’adala amam-pahotanay izany!

¹²Aoka re i Miriama tsy ho toy ny zazarano tsy azo izay lany sasaka ny nofony raha vao teraka!

¹³Nitaraina tamin’ny TOMPO i Mosesy ka nanao hoe: — Andriamanitra ô, mba sitrano re izy!

¹⁴Dia hoy ny TOMPO tamin’i Mosesy: — Raha nororan-drainy ny tavany, moa tsy ho menatra herinandro va izy? Avaho mandritra ny fito andro any ivelan’ny toby izy. Fa aorian’izany izy vao afaka miditra ao indray[45].

¹⁵Dia navahana tany ivelan’ny toby nandritra ny herinandro i Miriama, ary tsy niainga ny Israelita, raha tsy efa nandray ny toerany indray izy.

¹⁶Rehefa izany, dia niala tao Hatserôta ny vahoaka ka nitoby tao an-taniefitr’i Paràna.